شمېر 4

¹څښتن حضرت موسیٰ او حضرت هارون ته وفرمایل:

³هغه ټول نفر وشمېرئ چې عمر یې د دېرشو کالو څخه تر پنځوسو کالو پورې وي او په مقدسه خېمه کې د کار کولو توان ولري.

⁴په مقدسه خېمه کې د قهاتیانو کار دا دی چې په مقدسو شیانو باندې پام وکړي.

⁵کله چې د دې وخت راشي چې کمپ ته حرکت ورکړای شي نو هارون او د هغه زامن به خېمې ته ورننوزي، هغه پرده به راکښته کړي چې د لوظ د صندوق په مخ کې ده او صندوق به ورباندې پټ کړي.

⁶په هغه باندې به د ښې څرمنې پوښ واچوي او په سر باندې به یې یو داسې ټوکر خپور کړي چې پوخ آبي رنګ ولري او بیا به وړونکې میلې په کې ورننباسي.

⁷هغوی به په هغه مېز باندې چې خدای ته ورباندې ډوډۍ وړاندې کیږي یو آبي ټوکر خپور کړي او په هغه باندې به قابونه، د خوشبویۍ کاسې، د نذرانې دپاره کاسې او هغه منګي کېږدي چې د څښلو د نذرانو دپاره دي. په مېز باندې به همېشه ډوډۍ پرته وي.

⁸هغوی به په دې ټولو باندې یو سور ټوکر خپور کړي، د یوې ښې څرمنې پوښ به ورباندې واچوي او بیا به وړونکې میلې په کې ورننباسي.

⁹هغوی دې یو آبي ټوکر واخلي او دغه شیان دې ورباندې پټ کړي: څراغدان د څراغونو سره، د هغه پلتې پاکوونکي، پتنوسونه او د زیتونو د تېلو ټول لوښي چې د څراغونو دپاره استعمالیږي.

¹⁰هغوی به څراغدان او د هغه ټول سامان د ښې څرمنې په پوښ کې راتاو کړي او په یو وړونکي چوکاټ باندې به یې کېږدي.

¹¹بیا به د سرو زرو په قربانګاه باندې یو آبي ټوکر خپور کړي، د ښې څرمنې یو پوښ به ورباندې واچوي او بیا به وړونکې میلې په کې ورننباسي.

¹²هغوی به هغه ټول لوښي چې په مقدس ځای کې ورڅخه کار اخیستل کیږي واخلي او په یو آبي ټوکر کې به یې تاو کړي، د ښې څرمنې یو پوښ به ورباندې واچوي او په یو وړونکي چوکاټ باندې به یې کېږدي.

¹³د قربانۍ د ځای څخه به ایرې لېرې کړي او په هغه باندې به یو بانجاني ټوکر خپور کړي.

¹⁴په هغه ټوکر باندې دې هغه ټول سامان کېږدي چې د قربانۍ په ځای کې ورڅخه کار اخیستل کیږي: لکه د اور لوښي، د غوښې قاشق پنجې، بېلچې او د وینې د شیندلو کاسې. بیا به هغوی ورباندې د ښې څرمنې یو پوښ واچوي او وړونکې میلې به په کې ورننباسي.

¹⁵کله چې هارون او د هغه زامن د مقدس سامان او ټولو مقدسو موادو د پټولو څخه وزګار شي او کمپ د وړلو دپاره تیار شي، نو قهاتیان دې د دغو شیانو د وړلو دپاره راشي. مګر هغوی باید مقدسو شیانو ته لاس ورنه وړي که نه، نو مړه به شي. قهاتیان دې هغه شیان انتقال کړي چې په مقدسه خېمه کې دي.

¹⁶د هارون کاهن زوی العازار دې د دغو شیانو مسئولیت په غاړه واخلي: د څراغونو دپاره د زیتونو تېل، خوشبویي، د عادي غلې دانې نذرانه او د مسح کولو تېل. هغه دې د ټولې مقدسې خېمې او هرڅه چې په کې دي، د مقدس سامان او لوښو په شمول د هغو مسئولیت په غاړه واخلي.>

¹⁷څښتن حضرت موسیٰ او حضرت هارون ته وفرمایل:

¹⁸‏-

²⁰مګر قهاتیان باید دننه لاړ نه شي چې مقدس شیان وګوري، حتیٰ د یوې شېبې دپاره هم. که نه، نو مړه به شي.>

²¹څښتن حضرت موسیٰ ته وفرمایل:

²³هغه ټول نفر چې عمر یې د دېرشو کالو څخه تر پنځوسو کالو پورې وي او په مقدسه خېمه کې د کار کولو توان ولري وشمېره.

²⁴هغوی به د لاندینیو شیانو د وړلو مسئولیت په غاړه لري:

²⁵خېمه، د هغې داخلي او بیرونی پوښ، د هغې په سر باندې د ښې څرمنې پوښ، د دروازې پرده،

²⁶د خېمې او د قربانۍ د ځای د ګردچاپېره حویلۍ دپاره پردې، د حویلۍ د دروازې پرده، رسۍ ګانې او هرڅه چې د دې شیانو په ودرولو کې په کاریږي. جرشونیان د دې ټولو شیانو د ساتنې او ترتیبولو مسئولیت په غاړه لري.

²⁷ته او هارون به وګورئ چې جرشونیان دا ټول کارونه ترسره کوي او هر هغه شی چې هارون او د هغه زامنو هغوی ته ورسپارلی دی وړي که نه.

²⁸دا د مقدسې خېمې په کار کې د جرشونیانو وظیفې دي. هغوی به دا کار د هارون کاهن د زوی یعنې ایتامار تر لارښودنې لاندې ترسره کوي.>

²⁹څښتن حضرت موسیٰ ته وفرمایل:

³⁰هغه ټول نفر چې عمر یې د دېرشو کالو څخه تر پنځوسو کالو پورې وي او په مقدسه خېمه کې د کار کولو توان ولري وشمېره.

³¹هغوی به د چوکاټونو، اړمونو، ستنو او خېمې د پایو د وړلو مسئولیت ولري

³²او همدارنګه د خېمې د ګردچاپېره حویلۍ د ستنو، پایو، مېخونو، رسۍ ګانو او هغو ټولو شیانو چې د هغو په ودرولو کې په کاریږي. هر سړی به د ځانګړو شیانو د وړلو مسئولیت په غاړه ولري.

³³دا د مقدسې خېمې په کار کې د مراریانو وظیفې دي. هغوی به دا کار د هارون کاهن د زوی یعنې ایتامار تر لارښودنې لاندې ترسره کوي.>

³⁴‏-

⁴⁸حضرت موسیٰ، حضرت هارون او د اسراییلو نورو مشرانو د څښتن امر ته غاړه کېښودله او د قهاتیانو، جرشونیانو او مراریانو سرشمېرنه یې وکړه. هغوی دا کار طایفه په طایفه او کورنۍ په کورنۍ وکړ او هغه ټول خلک یې وشمېرل چې عمرونه یې د دېرشو او پنځوسو کالو ترمنځ وو او په مقدسه خېمه کې یې کار کولی شو. د هغو شمېر په لاندې ډول ؤ: قهاتیان ۲۷۵۰، جرشونیان ۲۶۳۰ او مراریان ۳۲۰۰ چې د ټولو شمېر ۸۵۸۰ ؤ.

⁴⁹څنګه چې څښتن په حضرت موسیٰ باندې امر کړې ؤ، هر سړی وشمېرل شو او هر یو ته د خدمت کولو یا د وړلو د وظیفې مسئولیت وسپارل شو.