رويا 12

¹نو بیا په اسمان کې یوه لویه نښه ښکاره شوه. هلته یوه ښځه وه چې لمر یې لکه د کالیو په شان اغوستی ؤ، سپوږمۍ یې تر پښو لاندې وه او په سر باندې یې د دولسو ستورو تاج ؤ.

²هغه امیدواره وه او د لنګون د درد له امله یې چیغې وهلې او په تکلیف وه.

³بیا په اسمان کې یوه بله نښه ښکاره شوه. هلته یو لوی سور ښامار ؤ چې اووه سرونه او لس ښکرونه یې لرل او په هر سر باندې یې تاج ؤ.

⁴هغه په خپلې لکۍ باندې د اسمان درېمه برخه ستوري راکش کړل او په ځمکه یې راوغورځول. ښامار د هغې ښځې په مخکې چې د ماشوم د زېږولو په حال کې وه ودرېده، د دې دپاره چې کله د هغې ماشوم وشي هغه یې ژوندی تېر کړي.

⁵بیا د هغې زوی پیدا شو چې په ټولو قومونو به د اوسپنې په امسا باندې حکومت کوي. خو د هغې ماشوم پورته د خدای او د هغه تخت ته یووړل شو.

⁶هغه ښځه بیابان، یعنې هغه ځای ته وتښتېدله چې خدای ورته تیار کړی ؤ، ترڅو هلته د یو زر او دوه سوه شپېته ورځو دپاره د هغې پالنه وشي.

⁷بیا په اسمان کې جنګ وشو. میکاییل او د هغه فرښتو د ښامار سره جنګ وکړ او ښامار او د هغه فرښتو د دوی سره جنګ وکړ.

⁸خو ښامار ماتې وخوړه او نور د هغه او د هغه د فرښتو دپاره په اسمان کې ځای نه ؤ.

⁹نو هغه لوی ښامار لاندې وغورځول شو، هغه زوړ او پخوانی مار چې د شیطان یا ابلیس په نوم یاديږي او ټوله نړۍ یې غولوله، د خپلو فرښتو سره لاندې ځمکې ته وغورځول شو.

¹⁰بیا مې په اسمان کې یو لوړ اواز واورېد چې ویل یې: «اوس زمونږ د خدای خلاصون، قدرت او پاچاهۍ او د هغه ټاکل شوي مسیح د واک او اختیار وخت رارسېدلی دی، ځکه هغه څوک چې زمونږ د خویندو او ورونو مدعي ؤ او شپه او ورځ به یې د خدای په حضور کې په هغوی باندې تور لګاوه، هغه د اسمان نه لاندې ځمکې ته غورځول شوی دی.

¹¹زمونږ خویندې او ورونه د وري د وینې او د پیغام د شاهدۍ په وسیله په هغه باندې بریالي شول، ځکه چې هغوی دې ته تیار وو چې خپل ژوند له لاسه ورکړي او حتی مړه شي.

¹²نو ای اسمانونو او تاسو چې په کې اوسېږئ، خوشحالي وکړئ. خو ای ځمکې او بحره! ستاسو په حال دې افسوس وي، ځکه شیطان تاسو ته ښکته درغی او په دې ښه پوهیږي چې زیات وخت ورسره نشته، نو هغه ډېر په قهر دی.»

¹³کله چې ښامار پوه شو چې ځمکې ته راغورځول شوی دی، نو د هغې ښځې پسې شو چې زوی یې زېږولی ؤ.

¹⁴خو ښځې ته د عقاب دوه لوی وزرونه ورکړل شول، ترڅو وکولای شي هغه ځای ته والوزي چې په بیابان کې ورته تیار شوی ؤ. هلته به تر درې نیمو کالو پورې د هغې پالنه وشي او د هغه ښامار د حملې نه به خوندي وساتل شي.

¹⁵بیا ښامار د خپلې خولې نه د اوبو سېلاب جاري کړ ترڅو هغه ښځه لاندې کړي او هغه یوسي.

¹⁶خو ځمکې د هغې ښځې سره مرسته وکړه، خوله یې خلاصه کړه او د اوبو هغه سېلاب یې چې ښامار د خپلې خولې نه جاري کړی ؤ، تېر کړ.

¹⁷نو ښامار په هغې ښځې باندې ډېر په قهر شو او لاړ چې د هغې د پاتې اولادې سره چې د خدای په حکمونو باندې عمل کوي او د عیسی په هکله شاهدي ورکوي، وجنګیږي.

¹⁸ښامار د بحر په غاړه ودرېده.