روميان 11

¹زه پوښتنه کوم چې ایا خدای خپل قوم رد کړی دی؟ هېڅکله نه! زه خپله هم اسراییلی یم، د ابراهیم د نسل نه او د بنیامین د قبیلې څخه یم.

²خدای خپل هغه قوم نه دی رد کړی چې د مخکې نه یې غوره کړی ؤ. ایا تاسو نه پوهېږئ چې د خدای کلام د الیاس پیغمبر په هکله څه وایي چې هغه څنګه د اسراییلو په خلاف خدای ته شکایت کوي او وایي:

³«څښتنه، هغوی ستا پیغمبران وژلي دي، ستا د قربانۍ ځایونه یې وران کړي دي او زه یوازې پاتې یم او هغوی هڅه کوي چې ما هم ووژني.»

⁴خو خدای هغه ته څه ځواب ورکړ؟ هغه دا ځواب ورکړ: «ما د خپل ځان دپاره اووه زره کسان چې د بعل بت ته یې سجده نه ده کړې، ساتلي دي.»

⁵همدارنګه په دې اوسنۍ زمانه کې هم یو شمېر خلک پاتې دي چې د خدای په فضل سره غوره شوي دي.

⁶خو که چېرې دا د فضل په وسیله وي، نو بیا د انسان د عملونو په وسیله نه دی. که نه، نو بیا فضل کومه معنی نه لري.

⁷نو بیا دا څه معنی؟ د اسراییلو خلک چې د کوم شي په لټه کې وو، هغه یې تر لاسه نه کړ. د خدای غوره شویو کسانو تر لاسه کړ، خو د نورو زړونه سخت شول.

⁸لکه څنګه چې د خدای په کلام کې لیکل شوي دي: خدای هغوی په روحاني درانه خوب ویده کړل چې تر نن ورځې پورې نه څه لیدلی شي او نه څه اورېدلی شي.

⁹او داود وایي:پرېږده چې شي یې دسترخوان ورته تیلک او داماو شي تیږه ورته داسې چې پرې وښوییږياو سزا وویني د خپلو کارونو

¹⁰سترګې یې ړندې شي چې ونه ویني هېڅاو کړوپې شي ملاګانې یې د تل دپاره

¹¹نو زه پوښتنه کوم، ایا هغوی داسې وښویېدل چې بیا به هېڅکله راپورته نه شي؟ هېڅکله نه، بلکې د هغوی د سرغړونې په سبب خلاصون د غیریهودیانو په برخه شو او له همدې امله د اسراییلو سره کینه پیدا شوه.

¹²اوس که چېرې د هغوی سرغړونه د دنیا د برکت سبب شوه او د هغوی روحاني ماتې د غیریهودیانو دپاره د برکت سبب شوه، نو بیا به د هغوی برکتونه نور څومره زیات شي چې کله ټول اسراییل په کې شامل شي.

¹³اوس تاسو غیریهودیانو ته وایم چې زه د غیریهودیانو دپاره رسول یم او په خپل کار باندې فخر کوم.

¹⁴ځکه کېدای شی چې په دې ډول وکولای شم د خپل قوم حسد او بخیلي راوپاروم او د هغوی څخه ځینې یې وژغورم.

¹⁵ځکه که د هغوی رد کېدل د دنیا سره د خدای د پخلا کېدلو سبب شو، نو د هغوی منل به لکه د مرګ نه د بیا راژوندي کېدلو په معنی وي.

¹⁶که چېرې د اوړو اولنۍ پېړه چې خدای ته د نذرانې په توګه وړاندې شي، سپېڅلې ده، نو بیا ټوله خمیره هم سپېڅلي ده. او که د ونې ریښې سپېڅلې وي، نو څانګې یې هم سپېڅلې دي.

¹⁷خو که چېرې ځینې څانګې پرېکړل شي او ته چې د ځنګلي زیتون یوه څانګه وې، په نورو څانګو کې پیوند شوې او د اصلي زیتون د ونې په ګټوره ریښه کې شریک شوې،

¹⁸نو خپل ځان د نورو څانګو نه لوړ مه ګڼه. که چېرې خپل ځان لوړ ګڼې، نو یاد ساته چې ریښه په تا باندې ولاړه نه ده، بلکې ته په ریښې باندې ولاړ یې.

¹⁹خو ته به وایې: «څانګې د دې دپاره پرېکړل شوې چې زه په کې پیوند شم.»

²⁰دا رښتیا ده. هغوی د خپلې بې ایمانۍ له امله پرېکړل شوې، خو تاسو د ایمان په وسیله هلته پاتې کېږئ. نو مغرور کېږئ مه، بلکې ووېرېږئ.

²¹ځکه که خدای هغه طبیعي څانګې په خپل ځای پرېنښودلې، نو تاسو به هم پرېنږدي.

²²نو د خدای مهرباني او سخت قضاوت په پام کې ونیسئ. خدای د هغو خلکو په وړاندې سختګیره دی چې لېرې لوېدلي دي، خو ستاسو په وړاندې مهربانه دی، که چېرې ته د هغه په مهربانۍ کې پاتې شې. که نه، نو ته به هم پرېکړل شې.

²³که چېرې یهودیان په بې ایمانۍ کې پاتې نه شي، نو هغوی به بیا پیوند کړل شي، ځکه چې خدای قدرت لري چې هغوی یوځل بیا سره پیوند کړي.

²⁴ځکه که چېرې تاسو غیریهودیان د ځنګلي زیتون د ونې نه پرېکړل شوي یئ او د خپل فطرت په خلاف د اصلي زیتون د ونې سره پیوند شوي یئ، نو بیا به هغه اصلي څانګې څومره په اسانۍ سره پیوند شي چې د اصلي زیتون د ونې خپلې څانګې دي.

²⁵ای خویندو او ورونو! زه نه غواړم چې تاسو د دې پټ راز نه بې خبره پاتې شئ او په خپلې پوهې باندې مغرور شئ. د ځینو اسراییلیانو زړونه سخت شوي دي او دا به تر هغه وخته پورې دوام وکړي، ترڅو د هغو غیریهودیانو شمېر پوره شي چې خلاصون مومي.

²⁶په دې ډول به ټول اسراییل خلاصون ومومي. لکه څنګه چې لیکل شوي دي: خلاصوونکی به د صهیون څخه راشي او هغه به د یعقوب د نسل څخه بې ایماني لېرې کړي.

²⁷زه به د هغوی سره لوظ وکړم چې د هغوی ګناهونه لېرې کړم.

²⁸د زېري په خاطر یهودیان د خدای دښمنان شول او دا ستاسو په ګټه دی. د خدای د خوښې له امله هغوی اوس هم خدای ته د هغوی د نیکونو ابراهیم، اسحاق او یعقوب په خاطر ګران دي.

²⁹ځکه چې د خدای نعمتونه او بلنه نه بدلېدونکي دي.

³⁰لکه څنګه چې تاسو غیریهودیانو یو وخت د خدای په وړاندې نافرماني کوله، خو اوس په تاسو باندې د یهودیانو د نافرمانۍ له امله رحم وشو،

³¹نو اوس هغوی نافرماني کوي او په تاسو باندې د خدای رحم وشو، نو له دې امله په هغوی باندې به هم د هغه رحم وشي.

³²خدای ټول خلک په نافرمانۍ کې راګېر کړل، ترڅو په ټولو باندې رحم وکړي.

³³واه، د خدای شتمني څومره زیاته ده او د هغه حکمت او پوهه څومره ژوره ده! د هغه قضاوتونه څومره پټ او د هغه په لارو پوهېدل څومره سخت دي.

³⁴ځکه د خدای په کلام کې لیکل شوي دي: څوک د څښتن په فکرونو باندې پوه شوی دی؟ یا څوک د هغه مشاور دی؟

³⁵یا چا خدای ته کوم څه ورکړي دي چې هغه ترې بېرته واخلي؟

³⁶ځکه چې ټول شیان د هغه له خوا دي او د هغه په وسیله پیدا شوي دي او د هغه دپاره دي. د هغه جلال دې تل ترتله وي. امین.