روميان 9

¹دا چې زه وایم چې د مسیح سره تړاو لرم نو رښتیا وایم او دروغ نه وایم. زما وجدان چې د روح القدس تابعداري کوي، د دې شاهد دی

²چې زما په زړه کې د خپل قوم یعنې یهودیانو په خاطر چې زما خپلوان دي ډېر لوی غم او نه ختمېدونکی خفګان دی.

³د هغوی دپاره زه په دې هیله وم چې لعنتي شم او د مسیح نه جدا شم.

⁴هغوی اسراییلیان دي او هغوی ته د خدای اولادونه ویل شوي دي او جلال، لوظونه، شریعت، د عبادت مراسم او وعدې ورکړل شوي دي.

⁵زمونږ نیکونه یعنې ابراهیم، اسحاق او یعقوب هم د هغوی سره تړاو لري او مسیح په انساني لحاظ د هغوی د نسل څخه دی. خدای چې په ټولو باندې حکومت کوي، هغه ته دې تل ترتله ثنا وي. امین.

⁶دا په دې معنی نه ده چې خدای د خپلو وعدو په پوره کولو کې ناکام شوی دی. ځکه چې ټول اسراییلیان د خدای غوره شوي خلک نه دي.

⁷او نه هم د ابراهیم ټول نسل د خدای اولادونه دي. ځکه چې خدای ابراهیم ته وویل: «ستا نسل به د اسحاق څخه حساب شي.»

⁸مقصد دا چې هغه ټول اولادونه چې په جسماني لحاظ د ابراهیم د نسل څخه پیدا شوي دي، د خدای اولادونه نه ګڼل کیږي، بلکې یوازې هغوی د خدای په اولادونو کې حسابیږي چې د خدای د وعدې له مخې پیدا شوي دي.

⁹ځکه چې د خدای وعده داسې وه: «کله چې زه په راتلونکي کال کې په همدې وخت بېرته راشم نو ساره به زوی ولري.»

¹⁰یوازې دا نه، بلکې ربکا د یو کس نه چې هغه زمونږ نیکه اسحاق دی، امیدواره شوه.

¹¹‏-

¹²خو د دې دپاره چې د خدای مقصد د دې غبرګونکو څخه د یو په غوره کولو کې پوره شي، نو خدای ربکې ته وویل: «مشر زوی به د کشر خدمت کوي.» هغه دا خبره د هغوی د زېږېدلو نه مخکې وکړه او مخکې له دې چې هغوی کوم ښه یا بد کار وکړي. ترڅو دا وښایي چې د خدای غوره کېدل د هغه د بلنې له مخې وو، نه د هغوی د عملونو له مخې.

¹³لکه څنګه چې د خدای په کلام کې لیکل شوي دي: «یعقوب راباندې ګران ؤ، خو د عیسو نه مې کرکه کوله.»

¹⁴نو بیا مونږ څه ووایو؟ ووایو چې خدای بې انصافه دی؟ هېڅکله نه!

¹⁵ځکه چې خدای موسی ته وویل: «زه چې په هرچا باندې وغواړم رحم وکړم، نو رحم ورباندې کوم او په هر چا باندې چې وغواړم زړه وسوځوم، نو زړه ورباندې سوځوم.»

¹⁶نو دا د انسان د خوښې او کوښښ پورې اړه نه لري، بلکې یوازې د خدای د رحم پورې اړه لري.

¹⁷ځکه چې د خدای کلام فرعون ته وایي: «ته ما د دې دپاره پاچا کړې چې ستا په وسیله خپل قدرت وښایم او زما نوم په ټوله دنیا کې مشهور شي.»

¹⁸نو هغه چې وغواړي په چا باندې رحم وکړي، نو رحم ورباندې کوي او که وغواړي چې د چا زړونه سخت کړي، نو د هغوی زړونه سختوي.

¹⁹نو تاسو به ماته ووایئ: «نو بیا ولې خدای مونږ ملامتوي؟ ځکه څوک کولای شي چې د هغه د ارادې په وړاندې ودریږي؟»

²⁰ای انسانه، ته څوک یې چې بېرته خدای ته ځواب ورکوې؟ ایا یو لوښی کلال ته ویلی شي چې زه دې ولې داسې جوړ کړی یم؟

²¹ایا یو کلال دا حق نه لري چې د هماغې یو موټي خاورې نه یو لوښی د ځانګړې کارونې دپاره او بل د عادي کارونې دپاره جوړ کړي؟

²²خدای هم همداسې کړي وو. هغه غوښتل چې خپل قهر وښایي او خپل قدرت ښکاره کړي. خو هغه د هغو کسانو په اړه د ډېر صبر او زغم څخه کار واخیست چې باید تباه شي.

²³هغه داسې وکړل ترڅو خپل لوی جلال هغو خلکو ته ښکاره کړي چې رحم ورباندې وشي، یعنې هغه خلک چې د مخکې نه یې دې ته تیار کړي وو چې د هغه جلال تر لاسه کړي.

²⁴ځکه چې مونږ هغه خلک یو چې هغه رابللي یو، یعنې یوازې هغه خلک نه چې یهودیان دي، بلکې د غیریهودیانو له منځ نه هم رابلل شوي دي.

²⁵لکه څنګه چې خدای د هوشع نبي په کتاب کې وایي:هغه خلک چې زما نه ووزه به ووایم هغوی ته خپل خلکاو چې په ما باندې ګران نه وو هغه خلکهغوی ته وبه وایم «خپل ګران»

²⁶او چې ویل شوي وو هغوی تهپه هماغه ځای کې:«تاسو نه یئ زما خلک»نو په هماغه ځای کې به هغوی تهوویل شي: «اولادونه د خدای»

²⁷او اشعیا نبي هم په لوړ اواز د اسراییلو په هکله داسې وایي:که څه هم اسراییلیان به وي بې شمېره لکه شګې د دریابخو د هغوی څخه به ومومي خلاصون لږ شمېر یې

²⁸ځکه څښتن به په پوره توګه او زر په مخ د ځمکېکړي به ترسره قضاوت خپل د ټولو خلکو په باره کې

²⁹او لکه څنګه چې اشعیا مخکې پېشګویي کړې وه:که پريښي یې نسلونه نه وای مونږ تهمطلق قادر څښتننو تباه شوي به وای مونږد سدوم او عمورې په شان.

³⁰نو بیا مونږ څه ووایو؟ که څه هم غیریهودیانو کوښښ نه کاوه چې د خدای په نظر کې عادلان وګڼل شي، خو هغه یې د ایمان په وسیله تر لاسه کړ.

³¹خو اسراییلیانو چې کوښښ کاوه د شریعت په وسیله عادلان وګڼل شي، نو هغه یې تر لاسه نه کړ.

³²ځکه چې د هغوی کوښښ د ایمان له لارې نه، بلکې د هغوی د خپلو عملونو په بنیاد ؤ. نو هغوی په هغې ښویېدونکې تیږې باندې وښویېدل.

³³لکه څنګه چې د خدای په کلام کې لیکل شوي دي:ګورئ، زه په صهیون کې ږدم یو داسې تیږهچې سبب د ښوییلو شي د خلکویو داسې ګټ چې پرې ولویږي هغویاو هرڅوک چې ایمان راوړي په هغه باندېنو هېڅکله به ونه شرمیږي.