تيطوس 3

¹ایماندارانو ته ور په یاد کړه چې د حاکمانو او د واک د خاوندانو تابعداري او د هغوی اطاعت دې کوي او د هر نېک کار دپاره دې تیار اوسي.

²هغوی ته ووایه چې د هېچا په هکله دې بد نه وایي او شخړه دې نه کوي، بلکې نرم مزاجه او د ټولو خلکو په وړاندې دې باادبه اوسي.

³ځکه چې مونږ هم یو وخت ناپوهه، نافرمانه، بې لارې او د هر ډول نفساني غوښتنو او عیاشیو غلامان وو او په کينې او بخیلتوب کې مو خپل ژوند کاوه. نورو زمونږ نه کرکه کوله او مونږ د نورو نه.

⁴خو کله چې زمونږ د خلاصوونکي خدای مهرباني او مینه ښکاره شوه،

⁵هغه مونږ ته خلاصون راکړ، خو نه د هغو نېکو کارونو له امله چې مونږ کړي وو، بلکې د هغه د رحم په وسیله مو تر لاسه کړ او روح القدس د وینځلو په وسیله مونږ ته نوی زېږون او نوی ژوند راکړ.

⁶هغه زمونږ د خلاصوونکي عیسی مسیح په وسیله روح القدس په پرېمانه توګه په مونږ باندې نازل کړ،

⁷ترڅو د هغه د فضل په وسیله عادل وګڼل شو او د هغې هیلې له مخې چې مونږ یې لرو، د تلپاتې ژوندون وارثان شو.

⁸دا خبره رښتیا ده.زه غواړم چې ته په دې باندې ټینګار وکړې، ترڅو هغه خلک چې په خدای باندې ایمان لري، دې ته پام وکړي چې خپل ځانونه نېکو کارونو ته وقف کړي. دا شیان ډېر ښه او د خلکو دپاره ګټور دي.

⁹خو د شجرو په هکله د کم عقلتوب بحثونو، بې اتفاقۍ او د شریعت په اړه د شخړو څخه ځان وساته، ځکه چې هغه بې ګټې او بې ارزښته دي.

¹⁰که چېرې یو کس بې اتفاقۍ ته لمن وهي، نو هغه ته یوځل یا دوه ځلې اخطار ورکړه او نور ورسره کار مه لره.

¹¹ځکه چې ته پوهېږې چې هغه کس بې لارې شوی دی او د هغه ګناه هغه ملامتوي.

¹²کله چې زه ارتیماس یا تیخیکاس تاته درولېږم، نو ډېر کوښښ وکړه چې زر خپل ځان د نیکوپولیس ښار ته راورسوې او ماته راشه، ځکه چې ما پرېکړه کړې ده چې ژمی هلته تېر کړم.

¹³د زیناس وکیل او اپولوس سره مرسته وکړه چې زر تر زره خپل سفر ته دوام ورکړي او ګورئ چې هغوی کوم شي ته اړتیا ونه لري.

¹⁴زمونږ خلک دې دا زده کړي چې خپل ځانونه نېکو کارونو ته وقف کړي، ترڅو د خلکو بیړنۍ اړتیاوې پوره کړي او د هغوی ژوند بې ګټې نه شي.

¹⁵هغه ټول کسان چې زما سره دي، تاته سلام وایي. هغو کسانو ته هم زما سلامونه ووایه چې زمونږ سره مینه لري او زمونږ په ایمان کې شریک دي. په تاسو ټولو دې د خدای فضل وي.