1 Korintoslylara haty 12

¹Eý doganlar, men ruhy sylaglar barada-da, siziň bihabar galmagyňyzy islemeýärin.

²Butparazkaňyz, biri sizi çekýän ýaly, dilsiz butlaryň yzyna eýerýärdiňiz.

³Şonuň üçin size aýdýaryn: Hudaýyň Ruhy bilen gepleýän kişi: «Isa lagnat!» diýmez, hiç kim hem Mukaddes Ruh bilen bolmasa: «Isa Rebdir!» diýip bilmez.

⁴Sylaglar dürli-dürli, ýöne Ruh şol bir Ruhdur.

⁵Gulluklar-da dürli-dürli, ýöne Reb şol bir Rebdir.

⁶Amallar dürli-dürli, ýöne hemmede her zady emele getirýän Hudaý şol bir Hudaýdyr.

⁷Ýöne her kişä Ruhuň aýan bolmagy hemmäniň peýdalanmagy üçin berilýär.

⁸Çünki Ruh arkaly birine akyldarlyk sözi, ýene birine şol Ruh arkaly bilim sözi,

⁹başga birine şol Ruh arkaly iman, beýlekä şol Ruh arkaly şypa sylaglary,

¹⁰birine gudrat görkezme, ýene birine pygamberlik, başga birine ruhlary saýgarma, beýleki birine dürli diller, ýene birine bolsa dilleri düşündirme berilýär.

¹¹Bularyň hemmesini bolsa şol bir Ruh emele getirýär. Ol her birine Öz halaýşyna görä, aýry-aýry bölüp berýär.

¹²Ýöne teniň bir we agzasynyň köp bolşy ýaly, teniň agzasy köp bolsa-da, bir tendir, Mesih-de şeýledir.

¹³Çünki ýehudy bolsun ýa grek bolsun, gul bolsun ýa azat bolsun ― biziň hemmämiz bir Ruh arkaly bir tene çokundyryldyk, hemmämize bir Ruhdan içirildi.

¹⁴Ten hem bir agzadan däl-de, köp agzadan ybaratdyr.

¹⁵Aýak: «Men el däldigim üçin, tene degişli däldirin» diýeni bilen, tene degişli bolman bilmez.

¹⁶Gulak: «Men göz däldigim üçin, tene degişli däldirin» diýeni bilen, tene degişli bolman bilmez.

¹⁷Tutuş ten göz bolan bolsa, onda eşidiş nirede bolardy? Bary eşidiş bolan bolsa, onda ysgaýyş nirede bolardy?

¹⁸Emma Hudaý agzanyň her birini tende Öz isleýşine görä goýdy.

¹⁹Hemmesi bir agza bolan bolsa, onda ten nirede bolardy?

²⁰Şeýlelikde, agza köp, ýöne ten bir.

²¹Göz ele: «Sen maňa gerek däl» diýip bilmez. Kelle aýaklara: «Siz maňa gerek däl» diýip bilmez.

²²Tersine, teniň ejiz görünýän agzalary has köp gereklidir.

²³Biz teniň hormatsyzrak görünýän agzasyna has köp hormat goýýarys, owadan däl agzalarymyzyň has köp görki bardyr.

²⁴Ýöne görkli agzalarymyz muňa mätäç däldir. Emma Hudaý tende hiçbir bölünişik bolman, agzalar deňlik bilen biri-biriniň aladasyny etsin diýip,

²⁵teni guranda, ähmiýetsiz agzalary has köp hormatlady.

²⁶Bir agza horluk çekse, ähli agzalar bilelikde horluk çeker. Bir agza şöhratlansa, ähli agzalar bilelikde şatlanar.

²⁷Siz Mesihiň teni, aýry-aýry agzalarysyňyz.

²⁸Hudaý ýygnakda birinjileri resul, ikinjileri pygamber, üçünjileri öwrediji edip oturtdy. Ondan soň gudrat görkezmeleri, soňra şypa sylaglaryny, ýardamlary, edaralary, dürli dilleri berdi.

²⁹Hemmeler resulmydyr? Hemmeler pygambermidir? Hemmeler öwredijimidir? Hemmeler gudrat görkezýänmidir?

³⁰Hemmeleriň şypa sylagy barmy? Hemmeler dürli dillerde gepleýärmi? Hemmeler dilleri manylandyrýarmy?

³¹Siz ulurak sylaglara yhlas ediň, men ýene size mundan hem gowy ýoly görkezeýin.