Efeslilere haty 5

¹Şeýlelikde, söýgüli çagalar ýaly bolup, Hudaýdan görelde alyň.

²Mesih bizi nähili söýen bolsa, Özüni biziň üçin atyr ysly sowgat, gurban hökmünde Hudaýa hödürlän bolsa, onda siz hem söýgüde geziň.

³Zynanyň, her hili hapalyk ýa açgözlügiň araňyzda ady-da agzalmasyn. Beýle zatlar mukaddeslere ýaraşýan däldir.

⁴Araňyzda edepsizlik, ýaňralyk, ýakymsyz ýaňsy bolmasyn. Bular ýaraşykly däldir. Munuň deregine şükür edilsin.

⁵Şuny bilip goýuň, hiç bir ahlaksyzyň, hapanyň ýa-da butparaz açgözüň Mesihiň we Hudaýyň Patyşalygynda mirasy ýokdur.

⁶Hiç kim sizi boş sözler bilen aldamasyn, çünki Hudaýyň gazaby söz diňlemeýänleriň başyna şu zatlar zerarly gelýändir.

⁷Şonuň üçin olar bilen gatnaşyk etmäň.

⁸Siz bir wagtlar garaňkylykdyňyz, ýöne indi Rebde yşyksyňyz. Yşyga degişli ynsanlar bolup geziň.

⁹Çünki Ruhuň miwesi her hili ýagşylykdan, dogrulykdan we hakykatdan ybaratdyr.

¹⁰Rebbiň pisindi oturjak zady aňlajak boluň.

¹¹Garaňkylygyň miwesiz işlerine gatyşmaň, gaýtam, olary paş ediň.

¹²Garaňkylykdakylaryň ogrynça edýän zatlaryny aýtmak aýypdyr.

¹³Ýöne yşygyň paş eden ähli zady görner. Çünki ähli zady äşgär edýän yşykdyr.

¹⁴Şonuň üçin: «Oýan, eý uka giden! Ölümden direl! Mesih saňa yşyk saçar» diýilýär.

¹⁵Şeýlelikde, akylsyzlar ýaly däl-de, akyldarlar ýaly, ünsüňizi dykgatly gezmäge gönükdiriň.

¹⁶Pursatdan peýdalanyň, çünki günler ýamandyr.

¹⁷Munuň üçin akmak bolman, Rebbiň isleginiň nämedigine düşüniň.

¹⁸Şerapdan serhoş bolmaň, onda edepsizlik bardyr, Ruhdan doly boluň.

¹⁹Biri-biriňize mezmurlar, öwgüli aýdymlar, ruhy nagmalar aýdyň, tüýs ýürekden Rebbe sazlar çalyp, nagmalar düzüň.

²⁰Hemişe ähli zat üçin Rebbimiz Isa Mesihiň ady bilen Ata Hudaýa şükür edip,

²¹Mesihe bolan uly hormatyňyz bilen birek-birege tabyn boluň.

²²Eý aýallar, Rebbe tabyn bolýan ýaly, äriňize tabyn boluň.

²³Çünki Mesihiň bedeniň Halasgäri bolup, imanlylar ýygnagynyň başy bolşy ýaly, erkek hem aýalyň başydyr.

²⁴Imanlylar ýygnagynyň Mesihe tabyn bolşy ýaly, aýallar-da herki zatda öz ärine tabyn bolsun.

²⁵Eý ärler, Mesihiň imanlylar ýygnagyny söýşi ýaly, siz hem aýalyňyzy söýüň.

²⁶Mesih imanlylar ýygnagyny suw bilen ýuwup, Hudaýyň sözi bilen tämizläp, mukaddes etmek üçin,

²⁷ony Özüne tegmiltsiz, ýygyrtsyz ýa-da şoňa meňzeş zatlarsyz şöhratda hödürlemek üçin, ýygnagyň mukaddes hem müýnsüz bolmagy üçin onuň ugrunda Özüni pida etdi.

²⁸Şunuň ýaly hem ärler aýalyny öz teni kimin söýmelidir. Aýalyny söýýän özüni söýýändir.

²⁹Çünki hiç kim hiç haçan öz tenini ýigrenmän, gaýtam, Mesihiň imanlylar ýygnagyny edişi ýaly, ony iýmitlendirip timarlaýandyr.

³⁰Çünki biz Onuň etinden, süňkünden bolup, Onuň bedeniniň agzalarydyrys.

³¹«Şol sebäpden hem erkek ata-enesini goýup, aýaly bilen höwrüger we ikisi bir ten bolar».

³²Bu syr uly, ýöne men Mesih barada, imanlylar ýygnagy barada gürrüň edýärin.

³³Şeýlelikde, her biriňiz aýalyňyzy özüňiz ýaly söýüň, aýal hem ärini sylasyn.