Galatýalylara haty 5

¹Şeýlelikde, Mesihiň bize beren azatlygynda berk duruň, gulçulyk boýuntyrygyny gaýtadan saldyrmaň.

²Ine, men Pawlus size diýýärin, sünnetlenseňiz, Mesihiň size hiç bir peýdasy degmez.

³Men ýene-de sünnetlenen her bir adamyň Mukaddes Kanuny bütinleý berjaý etmäge borçludygyna güwä geçýärin.

⁴Kanun bilen aklanjak bolýan siz Mesihden aýryldyňyz, Hudaýyň merhemetinden mahrum bolduňyz.

⁵Çünki biz aklanma umydyna iman bilen Ruh arkaly garaşýarys.

⁶Çünki Mesih Isada sünnetli ýa sünnetsiz bolmak hiç bir zady başarýan däldir, diňe söýgi bilen işleýän iman ähmiýetlidir.

⁷Siz oňat ylgaýardyňyz, hakykata bagly galmagyňyza kim päsgel berdi?

⁸Nähili aldawa düşdüňiz? Bu sizi çagyran Hudaý tarapyndan bolan däldir.

⁹Bir bölek hamyrmaýa bütin hamyry turşadýandyr.

¹⁰Başga hili oýlanmajagyňyza meniň Rebde ynamym bar. Akylyňyzy çaşyran kim bolsa bolsun, jezasyny çeker.

¹¹Eý doganlar, men heniz hem sünnetliligi wagyz edýän bolsam, onda näme häzir-de kowalanýaryn? Beýle bolsa, haç böwedi aradan aýrylardy!

¹²Sizi biynjalyk edenler özlerini agta etsin!

¹³Eý doganlar, siz azatlyga çagyryldyňyz, ýöne bu azatlygy günäli teniň nepi üçin ulanman, biri-biriňize söýgi bilen gulluk ediň.

¹⁴Çünki bütin kanun şu ýeke sözde jemlenendir: «Goňşyňy özüň ýaly söý!»

¹⁵Biri-biriňizi çeýnäp, iýýän bolsaňyz, onda biri-biriňizi ýok etmegiňizden habardar boluň.

¹⁶Ine, men diýýärin, Ruhda geziň, şonda teniň höweslerini ýerine ýetirmersiňiz.

¹⁷Çünki ten Ruha garşy bolana, Ruh hem tene garşy bolana höwes edýändir. Siz isläniňizi etmez ýaly, bular bir-birlerine garşydyr.

¹⁸Ruh size ýol görkezýän bolsa, onda kanun astynda dälsiňiz.

¹⁹Ten işleri bellidir. Olar zynahorlyk, murdarlyk, ahlaksyzlyk,

²⁰butparazlyk, jadygöýlük, duşmanlyk, dawa, göripçilik, gahar, jenjel, bölünişik, pyrgalar,

²¹içigaraçylyk, adam öldürmeklik, serhoşluk, aýşy-eşret we şunuň ýaly zatlardyr. Bulary edýänleriň Hudaýyň Patyşalygyny miras almajagyny ozal aýdyşym ýaly, ýene-de aýdýaryn.

²²Ruhuň miwesi bolsa söýgi, şatlyk, parahatlyk, sabyr, mähribanlyk, ýagşylyk, sadyklyk,

²³ýumşaklyk we nebsiňe buýurmaklykdyr. Bu zatlara garşy çykýan kanun ýokdur.

²⁴Mesih Isa degişli bolanlar bedeni hyjuw hem höwesleri bilen birlikde haça çüýländir.

²⁵Ruha görä ýaşaýan bolsak, onda Ruha görä-de gezeliň.

²⁶Biri-birimizi gaharlandyryp, bir-birimize içigaraçylyk edip, şöhratparaz bolmalyň.