Galatýalylara haty 6

¹Eý doganlar, bir adam bir ýazyk üstünde tutulsa, Ruha uýan siz beýle adamy ýumşaklyk ruhy bilen dogry ýola getiriň. Sen hem synalmaz ýaly, özüňe seret.

²Birek-biregiň ýüküni göterip, Mesihiň kanunyny berjaý ediň.

³Çünki bir adam hiçkä özüni bir zatdyr öýtse, öz-özüni aldaýandyr.

⁴Her kişi öz işini derňesin. Onsoň onuň başga biri hakda däl-de, özi hakda magtanjy bolar.

⁵Sebäbi her kim öz ýüküni özi götermelidir.

⁶Hudaýyň sözüni öwrenen öwreden bilen ähli ýagşylyklary paýlaşsyn.

⁷Aldanmaň, Hudaý Özüni ýaňsyladýan däldir! Adam näme ekse, şony orar.

⁸Çünki öz günäli teninde ekin eken tenden çüýreme orar, Ruhda eken bolsa Ruhdan ebedi ýaşaýyş orar.

⁹Ýagşylyk etmekden ýadamalyň, çünki gowşamasak, wagtynda orarys.

¹⁰Şeýlelikde, wagt barka hemmelere, ylaýta-da imanlylar içersine ýagşylyk edeliň.

¹¹Ine, men öz elim bilen size nähili uly harplar bilen ýazýaryn!

¹²Tende gowy görnesi gelýänler diňe Mesihiň haçy üçin azar görmez ýaly, sizi sünnetlenmäge mejbur edýändir.

¹³Çünki sünnetlileriň özi-de kanuny berjaý etmän, eýsem, siziň teniňiz bilen magtanmak üçin sünnetlenmegiňizi isleýärler.

¹⁴Men hiç haçan Rebbimiz Isa Mesihiň haçyndan başga bir zat bilen magtanmaryn. Ol haç arkaly dünýä maňa haça çüýlenendir, men hem dünýä haça çüýlenendirin.

¹⁵Çünki Mesih Isada sünnetlilik ýa sünnetsizlik möhüm däl, diňe täzeden ýaradylyş möhümdir.

¹⁶Bu kada uýanlaryň baryna, Hudaýyň Ysraýylyna parahatlyk we rehim bolsun!

¹⁷Mundan beýläk hiç kim maňa zähmet bermesin! Çünki men Reb Isanyň ýaralarynyň yzlaryny tenimde göterýärin.

¹⁸Eý doganlar, Rebbimiz Isa Mesihiň merhemeti siziň ruhuňyz bilen bolsun! Omyn.