Ýewreýlere haty 10

¹Mukaddes Kanun geljekki oňat zatlaryň asly däl-de, kölegesidir. Şu sebäpli her ýyl üznüksiz hödürlenen şol bir gurbanlar bilen Hudaýa ýakynlanlary hiç haçan kämillige ýetirip bilmez.

²Ýetirip bilsedi, onda gurban hödürlemek bes edilmezmidi? Çünki ybadat edenlerde bir gezek günäden tämizlenenden soň, indi günä aňy galmazdy.

³Emma ol gurbanlar günäleriň barlygyny her ýyl ýada salýar.

⁴Çünki öküzleriň, erkeçleriň gany bilen günäleriň aýrylmagy mümkin däldir.

⁵Munuň üçin Mesih dünýä gelýärkä diýýär: «Gurban, sowgat islemän, Maňa bir beden taýýarladyň.

⁶Ähli ýakylýan sowgatlary, günä üçin hödürlenýän gurbanlary halamadyň.

⁷Şonda Men diýdim: Kanun kitabynda Men hakda ýazylyşy ýaly, Seniň islegiňi berjaý etjek bolup, Eý Hudaýym, ine, Men geldim».

⁸Ozal Kanuna görä hödürlenenler hakda «gurbanlary, sowgatlary, ähli ýakylýan sowgatlary, günä üçin hödürlenýän gurbanlary islemediň, halamadyň» diýdi.

⁹Soňra-da «Eý Hudaý, Seniň islegiňi berjaý etjek bolup, ine, Men geldim» diýdi. Şeýdip, Mesih ikinjini berkarar etmek üçin, birinjini aradan aýyrýar.

¹⁰Biz bu isleg boýunça Isa Mesihiň bedeniniň bir gezek hödürlenmegi bilen mukaddes edildik.

¹¹Her bir ruhany bolsa günuzyn durup, gulluk edip, günäleri asla ýuwup bilmeýän şol bir gurbanlary öwran-öwran hödürleýär.

¹²Emma Mesih günäleriň deregine hemişelik üçin diňe bir gurban hödürländen soň, Hudaýyň sagynda oturdy.

¹³Şondan bäri hem duşmanlarynyň Öz aýaklarynyň astyna basgançak edilmegine garaşýar.

¹⁴Çünki mukaddes edilenleri diňe bir gurban bilen hemişelik kämillige ýetirdi.

¹⁵Mukaddes Ruh hem bu hakda bize güwä geçýär. Ilki:

¹⁶«Reb: Ol günlerden soň olar bilen baglajak ähtim budur diýýär: Kanunlarymy olaryň ýüregine goýup, bulary aňlaryna ýazaryn» diýýär.

¹⁷Onsoň: «Indi olaryň günälerini, kanunsyzlyklaryny ýada salmaryn» diýýär.

¹⁸Bularyň bagyşlanan ýerinde, indi günä üçin gurban bolmaz.

¹⁹Şoňa görä, eý doganlar, Isanyň gany bilen tutudan geçmäge, ýagny Öz bedeninden bize açan täze hem diri ýolundan mukaddes ýere girmäge bizde gaýrat bardyr.

²⁰Hudaýyň öýüne jogapkär uly Ruhanymyz hem bardyr.

²¹Şoňa görä, ýüregimiz erbet ynsapdan tämizlenip, bedenlerimiz tämiz suw bilen ýuwlup, imanyň beren ynamy bilen çyn ýürekden Hudaýa ýakynlaşalyň.

²²Umydymyzyň ykraryny berk saklalyň.

²³Çünki wadany beren Hudaý ynamdardyr.

²⁴Birek-biregi söýgi, oňat işler üçin gaýrata galdyrjak bolalyň.

²⁵Käbirleriniň endik edişi ýaly, ýygnanyşmagy goýman, gaýtam, ol günüň golaýlaýanlygyny näçe görseňiz, şonça-da biri-birimizi ruhlandyralyň.

²⁶Çünki hakykaty bilenimizden soň, bilgeşleýin günä etsek, günäler üçin indi gurban galman,

²⁷diňe garaşylan hökümiň howpy, duşmanlary ýuwutjak gyzgyn ot galar.

²⁸Musanyň kanunyny ret eden adam, iki ýa üç güwäniň sözi bilen rehimsiz ölýär.

²⁹Hudaýyň Ogluny basalan, özüni mukaddes eden ähtiň ganyny mukaddes hasaplamadyk, merhemet Ruhuny ryswa eden adam mundan näçe agyr jeza sezewar bolar öýdýärsiňiz?

³⁰Çünki biz, «Öç Meniňkidir, almytyny Men berjek», ýene-de «Reb Öz halkynyň üstünden höküm çykarar» Diýeni tanaýarys.

³¹Diri Hudaýyň eline düşmek elhençdir!

³²Siz bolsa ýagtylyga çykanyňyzdan soň, görgüler bilen uly göreşe döz gelen ilki günleriňizi ýada salyň.

³³Siz bir tarapdan aç-açan sütemler hem muşakgatlara sezewar edildiňiz, bir tarapdan hem şeýle ýagdaýlara uçranlara ýoldaş bolduňyz.

³⁴Çünki siz hem tussaglykda çeken dertlerime şärik bolduňyz, hem-de özüňiziň oňat, durumly malyňyzyň barlygyny bilip, mallaryňyzyň talanmagyny begenç bilen unadyňyz.

³⁵Şeýlelikde, gaýratyňyzy elden bermäň, onuň sylagy uludyr.

³⁶Çünki Hudaýyň islegini berjaý edeňizden soň wada gowşar ýaly, sabyr size gereklidir.

³⁷Çünki az salymdan soň: «Geljek geler, gijä galmaz.

³⁸Meniň dogry adamym iman bilen ýaşar. Eger-de yza çekilse, Men ony halamaryn».

³⁹Biz yza çekilip, heläklenýänlerden däl-de, iman edip gutulýanlardandyrys.