Ýowel 2

¹Siýonda surnaý çalyň, Meniň mukaddes dagymda howpuň abanýandygyny duýduryň. Goý, ýurduň tutuş ilaty gorkudan sandyrasyn, çünki Rebbiň güni ýetip gelýär – garaňkylyk hem-de zulmat güni ol.

²Bulutly hem tüm garaňky gündür ol. Köpsanly hem güýçli bir leşger, daglara ýaýraýar daň şapagy deý. Owaldan bäri onuň deňi-taýy bolmandy, soňky nesillerden hem ol deýin bolmaz.

³Onuň öňünden ot ýalmap-ýuwudýar, yzyndan-da ýalyn köýdüryär. Öň ýanynda toprak Erem bagy deý, yz ýanynda – tozap ýatan beýewan. Ondan hiç zat gutulyp-da bilmeýär.

⁴Olaryň sypaty atlaryňky deý, bedewler deý hüjüm edýärler.

⁵Olar söweşe taýýar güýçli leşger dek, şöweş arabalarynyň takyrdaýşy dek, samany ýandyrýan ýalnyň şatyrdaýşy dek, dag depelerinden böküp aşýarlar.

⁶Halklar dowla düşýär olaň öňünde, ýüzleri-de gorkudan ak tama dönýär.

⁷Olar söweşiji deý hüjüm edýärler, esgerler deý dyrmaşýarlar diwara. Hersi barýar öňe öz ugry bilen, sowulmaýar olar öz ýodasyndan.

⁸Iteklemeýärler birek-biregni, ýöreýär öz ýodasyndan her biri. Ähli böwetleri böwsüp geçýärler, olaryň badyny saklap bolmaýar.

⁹Olar şähere tarap okdurylýarlar, ylgaýarlar diwarlaryň ýüzünden, dyrmaşyp, jaýlara aralaşýarlar, ogry kimin penjirelerden girýärler.

¹⁰Olaryň öňünde ýer endireýär, asman bolsa lerzana gelýär, Günüň, Aýyň ýüzi garalýar, ýyldyzlar hem şöhlesini gizleýär.

¹¹Reb Öz leşgeriniň öňünde batly seslenýär. Neneňsi köpsanly Onuň leşgeri! Onuň buýrugyna tabyn bolýanlaryň ýokdur hasaby. Dogrudan-da, Rebbiň güni beýikdir, elhençdir şübhesiz – çydajak barmy?

¹²Reb heniz hem aýdýar: agyz bekläp, aglap, ýas tutup, tutuş ýüregiňiz bilen Maňa öwrüliň.

¹³Eşikleriňize derek ýürekleriňizi parçalaň, Hudaýyňyz Rebbe dolanyp geliň. Merhemetli hem rehimli, giň göwünli, wepaly söýgä baý, jeza bermekden el çekmäge taýyndyr Ol.

¹⁴Kim bilýär, belki, ýüz öwürmän, eder rehimi, Özünden soň goýar berekedini, hatda Hudaýyňyz Rebbe berilýän galladyr içgi sadakalaryny?

¹⁵Siýonda çalyň surnaýy, jar ediň mukaddes ýygnanyşygy, Agyz beklemäge belläň siz wagty,

¹⁶Halky ýygnap, jemagaty tämizläň, ýaşululary hem çagalary, hatda emýän bäbekleri çagyryň. Goý, öýlenýän ýigit öz otagyndan, gelin-de öz tutusyndan çyksynlar.

¹⁷Rebbe girelge bilen gurbanlyk sypasynyň arasynda hyzmat edýän ruhanylar aglasyn. Diýsinler: «Öz halkyňa rehim eýle, Reb, halklara gülki bolmazlyk üçin, Sen etme masgara saýlan halkyňy. Nämä gerek: „Olaryň Hudaýy nirede?“ diýlip, aýdylmagy arasynda milletleň». Reb Öz halkyny ýalkajak

¹⁸Reb şonda gabandy Öz topragyny hem-de Öz halkyna indi rehimi.

¹⁹Reb jogap berip, diýdi halkyna: Ynha Men size iberýän – Gallany, şeraby, zeýtun ýagyny, Doýup-ganyp iýersiňiz olardan. Mundan beýläk milletler arasynda Men sizi etmerin indi masgara.

²⁰Men demirgazyk leşgerini sizden uzaklaşdyryp, äkiderin ony suwsuz boş ýere, gündogar deňzine – onuň öňüni, günbatar deňzine – onuň ardyny. Göteriler göge maslyk yslary, elhepus, ol etdi beýik işleri!

²¹Eý toprak, gorkmagyn, şatlan hem begen. Sebäbi Reb etdi beýik işleri!

²²Gorkmaň siz, eý, çöl haýwanlary, sebäbi ýaşyldyr çöl ýaýlalary. Baglar getirýär öz miwesini, zeýtun hem-de üzüm berýär bol hasylyny.

²³Eý, Siýon perzentleri, begeniň, Beýik Hudaýyňyzda şatlanyň! Çünki adalat üçin, Ol güýz ýagşyny ýagdyrdy; Ol size bolelin ýagşy eçildi. Ozal bolşy ýaly ýagdyrdy, güýz hem-de ýaz ýagyşlaryny.

²⁴Harmanlar dolar galladan, çelekler hem dolup-daşarlar täze şerap bilen zeýtun ýagyndan.

²⁵Men üstüňize iberen ägirt leşgerimiň: ganat baglamadyk, ganat baglan, ýumurtgadan çykan we gemriji çekirtge sürüsiniň hasyly iýip gutaran ýyllarynyň Öwezini dolaryn.

²⁶Siziň iýjegiňiz bolelin bolar, gerk-gäbe doýarsyňyz olardan; siziň üçin ajaýyp işleri eden Hudaýyňyz Rebbiň adyna aýdarsyňyz siz alkyşlar. Meniň halkym gaydyp utandyrylmaz.

²⁷Siz Meniň Ysraýylyň arasyndadygymy, Beýik Hudaýyňyzyň Mendigimi, özgäniň-de ýokdugyny bilersiňiz. Meniň halkym gaydyp utandyrylmaz.

²⁸Şondan soň Men her bir ynsan üstüne Öz Ruhumy dökerin. Pygamberlik eder oguldyr gyzlaryňyz, düýşler görer garrylaryňyz, aýanlyk alarlar ýigitleriňiz.

²⁹Şol günlerde Men Ruhumy suw deý dökerin, hatda gullardyr gyrnaklaryň üstüne.

³⁰Men asmanda we ýerde alamatlar: gan, ot hem-de tüsse sütünlerini görkezerin.

³¹Rebbiň beýik we gazaply güni gelmezden ozal, Gün tümlüge, Aý hem gana döner.

³²Şonda Rebbi çagyran her bir ynsan gutular, çünki Rebbiň aýdyşy ýaly, gaçyp gutulanlar Siýon dagynda we Iýerusalimde bolar, aman galanlaryň arasynda Rebbiň çagyranlary-da bolar.