Ýahýanyň Hoş Habary 15

¹Men hakyky üzüm agajydyryn, Atam bagbandyr.

²Mendäki miwe bermeýän her bir şahany Ol keser, miwe berýänini bolsa has-da köp miwe bersin diýip timarlar, tämizlär.

³Meniň size aýdan sözüm arkaly siz indi tämizsiňiz.

⁴Siz Mende galyň, Men hem sizde galaýyn. Üzüm agajyndan aýrylan şahanyň öz-özünden miwe berip bilmeýşi ýaly, Menden aýrylsaňyz, siz hem miwe berip bilmersiňiz.

⁵Men üzüm agajydyryn, siz şahalarsyňyz. Kim Mende galýan bolsa we Men kimde galýan bolsam, ol bol miwe berer. Siz Menden üzňe hiç zat edip bilmersiňiz.

⁶Kim Mende galmasa, şaha kimin kesilip taşlanar, gurar. Olary ýygnaşdyryp, oda atarlar, olar hem ýanar.

⁷Siz Mende galsaňyz, Meniň sözlerim sizde galsa, islän dilegiňiz biter.

⁸Siziň köp miwe bermegiňiz bilen Atam şöhratlanar. Şeýlelikde, siz Meniň şägirtlerim bolarsyňyz.

⁹Atamyň Özümi söýşi ýaly, Men-de sizi söýdüm. Meniň söýgimde galyň.

¹⁰Meniň Atamyň buýruklaryny berjaý edip, Onuň söýgüsinde galyşym ýaly, siz hem buýruklarymy berjaý etseňiz, Meniň söýgimde galarsyňyz.

¹¹Size bu zatlary Meniň şatlygym sizde bolsun we şatlygyňyz doly bolsun diýip aýtdym.

¹²Meniň buýrugym şu: biri-biriňizi Meniň sizi söýşüm ýaly söýüň.

¹³Bir adamyň öz dostlary üçin janyny pida etmeginden uly söýgi hiç kimde ýokdur.

¹⁴Meniň özüňize buýranymy berjaý etseňiz, Maňa dostsuňyz.

¹⁵Mundan beýläk Men size gul diýmerin, çünki gul agasynyň näme edýänini bilýän däldir. Men size dost diýdim, çünki Atamdan eşiden ähli zatlarymy size aýtdym.

¹⁶Siz Meni saýlamadyňyz, Men sizi saýladym, gidip, miwe öndüriň we miwäňiz uzak galsyn diýip, sizi wezipä belledim. Şeýlelikde, Meniň adym bilen Atadan näme dileseňiz, Ol size berer.

¹⁷Meniň size buýrugym şu: biri-biriňizi söýüň.

¹⁸Dünýä sizi ýigrense, onuň sizden öň Meni ýigrenendigini biliň.

¹⁹Dünýäden bolan bolsaňyz, dünýä sizi özüniňkiler kimin söýerdi. Ýöne dünýäden däldigiňiz üçin, Meniň sizi dünýäden saýlap alanlygym üçin, ine, şunuň üçin dünýä sizi ýigrenýär.

²⁰Meniň size „Gul öz agasyndan uly däldir" diýen sözümi ýada salyň. Olar Meni yzarlan bolsalar, onda sizi-de yzarlarlar. Meniň sözümi tutan bolsalar, siziňkini-de tutarlar.

²¹Olar size bu zatlaryň ählisini Meniň adym sebäpli ederler, çünki olar Meni Ibereni tanamaýarlar.

²²Men gelip, olara aýtmadyk bolsadym, onda günäleri bolmazdy, ýöne indi günäleri üçin ötünçleri ýokdur.

²³Meni ýigrenýän Meniň Atamy-da ýigrenýändir.

²⁴Men başgasynyň etmedik işlerini olaryň arasynda etmedik bolsam, onda günäleri bolmazdy, ýöne indi görüp, hem Meni, hem-de Atamy ýigrendiler.

²⁵Kanunlarynda: „Meni nähak ýigrendiler" diýip ýazylan söz berjaý bolmalydyr.

²⁶Atadan size iberiljek Göwünlik Berijim, ýagny Atadan çykan Hakykat Ruhy gelende, Men hakda güwälik eder.

²⁷Siz-de güwälik edersiňiz, çünki başdan Meniň bilen bilediňiz.