Lukanyň Hoş Habary 3

¹Kaýsar Tiberiusyň häkimliginiň on bäşinji ýylynda, Pontius Pilatus Ýahudanyň häkimikä, Hirodes Jelile tetrarhy, onuň dogany Filipus Iturea we Trahonitis welaýatynyň tetrarhy, Lisaniýas Abiliniň tetrarhydy.

²Hanna bilen Kaýafa hem baş ruhanydy. Şonda çölde Zekerýanyň ogly Ýahýa Hudaýyň sözi geldi.

³Ol Iordanyň töweregindäki bütin ýurtlara aýlanyp, günäleriň ötülmegi üçin toba edip çokundyrylmagy wagyz edýärdi.

⁴Şonuň ýaly-da, Işaýa pygamberiň kitabynda ýazylgydyr: «Çölde gygyrýanyň sesi: Rebbiň ýoluny taýýarlaň, Onuň ýodalaryny dogrulaň.

⁵Her dere doldurylar, her dag, depe peseldiler, egri ýollar dograldylar, çarkandakly ýollar tekizlener.

⁶Bütin adamzat Hudaýyň gutaryşyny görer».

⁷Ýahýa çokundyryljak bolup ýanyna gelýän halaýyga şeýle diýýärdi: «Eý, alahöwrenler nesli! Geljek gazapdan gaçmagy size kim salgy berdi?

⁸Indi, toba mynasyp miweler öndüriň. Içiňizden: „Biziň atamyz Ybraýymdyr" diýip başlamaň. Çünki men size aýdýaryn: Hudaý Ybraýyma şu daşlardan-da perzent ýaratmagy başarýandyr.

⁹Palta eýýäm agaçlaryň düýbünde ýatyr: oňat miwe bermeýän agaç kesilip, oda taşlanar».

¹⁰Halaýyk ondan: «Onda, biz näme etmeli?» diýip sorady.

¹¹Ol: «Iki köýnekli birini köýneksize bersin. Azykly hem şonuň ýaly etsin» diýdi.

¹²Salgytçylar-da çokundyrylmak üçin onuň ýanyna gelip: «Mugallym, biz näme etmeli!» diýdiler.

¹³Ýahýa olara: «Özüňize bellenenden artyk almaň» diýdi.

¹⁴Esgerler-de: «Onda, biz näme etmeli?» diýip, ondan soradylar. Olara: «Hiç kimi talamaň, hiç kime töhmet atmaň, öz hakyňyza kaýyl boluň» diýdi.

¹⁵Halk garaşyp durka, hemmesi Ýahýa hakda öz içlerinden: «Bu Mesihmikä?» diýip oýlanýardylar.

¹⁶Ýahýa hemmesine şeýle diýdi: «Men sizi suw bilen çokundyrýaryn, ýöne menden güýçli Biri geler. Men Onuň çarygynyň bagyny çözmäge-de mynasyp däldirin. Ol sizi Mukaddes Ruh hem ot bilen çokundyrar.

¹⁷Onuň küregi elindedir. Ol harman ýerini süpürip, bugdaýy ammaryna üýşürip, samany sönmez otda ýakar».

¹⁸Ol başga-da köp öwüt-ündew edip, halka Hoş Habary wagyz edýärdi.

¹⁹Emma Hirodes tetrarh doganynyň aýaly Hirodiýa üçin we öz eden ähli erbet işleri üçin, Ýahýanyň käýinjine sezewar bolany zerarly,

²⁰bu ähli erbetlikleriň üstüne Ýahýany zyndana salmaklygy hem goşdy.

²¹Bütin halk çokundyrylyp ýörkä, Isa-da çokundyryldy. Ol doga edip otyrka, Gök açylyp,

²²Mukaddes Ruh jan-ten bolup, kepderi kimin Onuň üstüne indi. Gökden: «Sen Meniň söýgüli Oglumsyň. Men senden köp razydyryn» diýen owaz geldi.

²³Isa Öz hyzmatyna başlan wagty otuz ýaşlaryndady, çak edilişine görä, Ýusup ogly, Eli ogly,

²⁴Mattat ogly, Lewi ogly, Melki ogly, Ýannaý ogly, Ýusup ogly,

²⁵Mattatýa ogly, Amos ogly, Nahum ogly, Esli ogly, Naggaý ogly,

²⁶Maat ogly, Mattatýa ogly, Semeýn ogly, Ýoseh ogly, Ýoda ogly,

²⁷Ýoanan ogly, Risa ogly, Zerubabel ogly, Şealtiýel ogly, Neri ogly,

²⁸Melki ogly, Addi ogly, Kosam ogly, Elmadam ogly, Er ogly,

²⁹Ýeşu ogly, Elizer ogly, Ýorim ogly, Mattat ogly, Lewi ogly,

³⁰Simun ogly, Iuda ogly, Ýusup ogly, Ýonam ogly, Elýakim ogly,

³¹Melea ogly, Menna ogly, Mattata ogly, Natan ogly, Dawut ogly,

³²Ýesse ogly, Obed ogly, Boaz ogly, Salmon ogly, Nahşon ogly,

³³Aminadap ogly, Ram ogly, Hesron ogly, Peres ogly, Iuda ogly,

³⁴Ýakup ogly, Yshak ogly, Ybraýym ogly, Teraz ogly, Nahor ogly,

³⁵Seruh ogly, Reu ogly, Peleg ogly, Eber ogly, Şela ogly,

³⁶Kainan ogly, Arfakşad ogly, Sam ogly, Nuh ogly, Lamek ogly,

³⁷Metuşelah ogly, Hanok ogly, Ýared ogly, Mahalaleýel ogly, Kainan ogly,

³⁸Enoş ogly, Şit ogly, Adam ogly, Hudaý ogludy.