Markusyň Hoş Habary 13

¹Isa ybadathanadan çykanda, şägirtleriniň biri Oňa: «Mugallym! Gör, ne ajap daşlar, ne ajap jaýlar!» diýdi.

²Isa oňa: «Bu uly jaýlary görýäňmi? Bu ýerde daş üstünde daş galmaz, hemmesi dargar» diýdi.

³Ol Zeýtun dagynda ybadathananyň garşysynda otyrka, Petrus, Ýakup, Ýahýa we Andreas dagy ýekelikde Ondan:

⁴«Bize aýt, bu zatlar haçan bolar? Bularyň ählisiniň ýerine ýetjek mahaly näme alamat peýda bolar?» diýip soradylar.

⁵Isa-da olara gürrüň bermäge durdy: «Habardar boluň, sizi aldaýmasynlar!

⁶Köpler Meniň adym bilen gelip: „Men ― Ol" diýer. Olar köp adamy aldarlar.

⁷Uruş seslerini, uruş turanlygy barada habar eşideňizde gorkmaň. Bular bolmalydyr, ýöne entek dünýäniň soňy däldir.

⁸Çünki millet-millete, patyşalyk-patyşalyga garşy çykar. Aýry-aýry ýerlerde ýer titremeler, açlyklar we belalar ýüze çykar. Bu wakalar burgularyň başlangyjydyr.

⁹Emma siz özüňize habardar boluň! Sebäbi sizi mejlislere tabşyrarlar, sinagogalarda ýenjerler. Olara güwälik üçin Men sebäpli sizi hökümdarlaryň, patyşalaryň alnynda durzarlar.

¹⁰Öňürti Hoş Habar bütin milletlere wagyz edilmelidir.

¹¹Sizi suda tabşyrjak bolup alyp barýarkalar, näme diýjegiňizi öňünden gaýgy etmäň, şol sagatda size näme berilse, şony diýiň. Çünki gepleýän siz däl-de, Mukaddes Ruhdur.

¹²Dogan ― dogany, ata ― çagasyny ölüme tabşyrar. Çagalar hem ata-enelerine garşy bolup, olary öldürderler.

¹³Meniň adym üçin hemmeler sizi ýigrener, ýöne soňuna çenli çydan halas bolar.

¹⁴Weýrançylyk getirýän, Daniýel pygamberiň aýdan ýigrenjisiniň bolmaly däl ýerinde duranyny göreniňizde, (okyjy düşünsin) Ýahudadakylar daglara gaçsyn.

¹⁵Öýüň üçegindäki aşak inip, bir zat almak üçin, içerik girmesin.

¹⁶Ekin meýdanyndaky donuny almak üçin, yzyna öwrülmesin.

¹⁷Ol günlerde göwreli, çaga emdirýän aýallaryň gününe waý!

¹⁸Siz bu waka gyşda bolmasyn diýip doga ediň.

¹⁹Çünki ol günlerde şeýle bir muşakgat bolar welin, beýle muşakgat Hudaýyň bar eden ýaradylyşynyň başyndan tä şu wagta çenli ne bolandyr, ne-de bolar.

²⁰Reb ol günleri gysgaltmadyk bolsady, onda hiç kim halas bolmazdy. Emma Ol saýlan saýlantgylarynyň hatyrasyna ol günleri gysgaltdy.

²¹Şonda biri size: „Ine, Mesih şu ýerde" ýa „Ine, ol ýerde" diýse, ynanmaň.

²²Çünki ýalan mesihler, ýalan pygamberler döräp, mümkin boldugyça saýlananlary-da azdyrjak bolup, alamatlar, mugjyzalar görkezer.

²³Ägä boluň. Men hemme zady size öňünden aýtdym».

²⁴Şol günlerde ol muşakgatdan soň, Gün garalar, Aý yşygyny bermez.

²⁵Ýyldyzlar Gökden gaçar, Gökdäki güýçler titreşer.

²⁶Şonda Ynsan Oglunyň bulutlar içinde uly gudrat hem şöhrat bilen gelýänini görerler.

²⁷Şonda Ol perişdelerini ýollap, Öz saýlanlaryny dört tarapdan Ýeriň ujundan tä Gögüň ujuna çenli ýygnar».

²⁸Injir agajyndan sapak alyň: onuň şahalary ýumşap, ýaprak çykaran mahaly tomsuň golaýdygyny bilýärsiňiz.

²⁹Şonuň ýaly-da, bu zatlaryň bolýanyny göreniňizde, Ynsan Oglunyň golaýdygyny, gapynyň agzyndadygyny biliň.

³⁰Size dogrusyny aýdýaryn, bütin bu zatlar bolýança, bu nesil dünýäden ötmez.

³¹Gök hem ýer öter, ýöne Meniň sözlerim ötmez».

³²Emma ol güni hem ol sagady hiç kim bilýän däldir, ne Gökdäki perişdeler, ne-de Ogul, diňe Ata bilýändir.

³³Ägä, oýa boluň, doga ediň! Çünki siz ol wagtyň haçandygyny bilmeýärsiňiz.

³⁴Bu uzak ýola çykan adam kimindir. Ol öýünden aýrylyp barýarka, hyzmatkärlerine ygtyýar, her haýsyna-da öz işini berip, gapynyň garawulyna-da oýa bolmagy tabşyrýandyr.

³⁵Şeýlelikde, oýa boluň, çünki siz öý eýesiniň agşammy, ýary gijemi, horaz gygyrandamy, ertir irdenmi ― haçan geljegini bilmeýärsiňiz.

³⁶Ol birden gelip-de, ukuda üstüňizi basaýmasyn.

³⁷Size aýdýanlarymy hemmelere aýdýaryn: oýa boluň!»