Markusyň Hoş Habary 15

¹Ertir irden baş ruhanylar, ýaşulular, kanunçylar we bütin mejlis maslahat geçirip, Isany daňyp, Pilatusa eltip tabşyrdylar.

²Pilatus Ondan: «Sen ýehudylaryň patyşasymy?» diýip sorady. Ol jogap berdi: «Seniň aýdyşyň ýalydyr» diýip jogap berdi.

³Baş ruhanylar Ony köp zatlarda aýypladylar.

⁴Pilatus ýene-de Oňa: «Sen hiç hili jogap berjek dälmi? Gör, näçe zatlarda Seni aýyplaýarlar» diýdi.

⁵Emma Isa başga hiç hili jogap bermedi. Pilatus geň galdy.

⁶Pilatus her Pesah baýramynda halkyň dilän tussagyny boşadardy.

⁷Pitnede adam öldüren gozgalaňçylar bilen bile tussaga salnan Barabbas atly biri bardy.

⁸Halk Pilatusdan hemişeki edýän zadyny özleri üçin ýerine ýetirmegini gygyryşyp haýyş etdi.

⁹Pilatus bolsa olara: «Ýehudylaryň patyşasyny boşatmagymy isleýärsiňizmi?» diýdi.

¹⁰Çünki ol baş ruhanylaryň Ony göriplikden tabşyrandyklaryny bilýärdi.

¹¹Emma Munuň ýerine Barabbasy boşatmagyny talap ediň diýip, baş ruhanylar halky dürtgülediler.

¹²Pilatus ýene olara: «Onda, men siziň ýehudylaryň patyşasy diýýän Adamyňyzy näme edeýin?» diýdi.

¹³Olar bolsa: «Ony haça çüýle!» diýip, ýene gygyryşdylar.

¹⁴Pilatus olara: «Ol näme ýaman iş etdi?» diýdi. Emma Olar: «Ony haça çüýle!» diýip, has beter gygyryşdylar.

¹⁵Şonda Pilatus halky kanagatlandyrma kararyna gelip, Barabbasy boşatdy, Isany bolsa gamçyladyp, haça çüýlemäge berdi.

¹⁶Esgerler Ony Pretorium diýen hökümet köşgüne eltip, bütin goşun bölümlerini çagyrdylar.

¹⁷Onuň egnine gyrmyzy don, başyna hem tikenden täç geýdirdiler.

¹⁸«Salam, eý, ýehudylaryň patyşasy» diýip, Oňa salam beren boldular.

¹⁹Başyna taýak bilen urdular, üstüne tüýkürdiler, öňünde dyza çöküp, Oňa sežde eden boldular.

²⁰Ony masgaralanlaryndan soň, gyrmyzy dony egninden çykardylar-da, Öz egin-eşigini geýdirip, haça çüýlemäge äkitdiler.

²¹Isgender bilen Rufusyň kakasy kireneli Simun meýdandan gelşine, şol ýerden geçip barýardy. Ony Isanyň haçyny götermäge mejbur etdiler.

²²Isany Golgata, ýagny «Kelleçanak» diýen ýere eltdiler.

²³Oňa mür gatylan şerap berdiler, ýöne Ol almady.

²⁴Ony haça çüýlediler, kim näme alarka diýip bije atyşyp, Onuň egin-eşigini özara paýlaşdylar.

²⁵Ony haça çüýlänlerinde günortan bolmaga üç sagat wagt galypdy.

²⁶Depesindäki etmiş ýazgysynda bolsa: «ÝeHUDYLARYŇ PATYŞASY» diýip ýazylgydy.

²⁷Isa bilen bile iki garakçyny haça çüýlediler, olaryň biri Onuň sag tarapynda, biri-de çep tarapyndady.

²⁸Şeýlelik bilen, «ol şer iş edýänlerden saýyldy» diýen Ýazgy berjaý boldy.

²⁹Geçip barýanlar başlaryny ýaýkap, Oňa sögüp: «Päheý-de welin, ybadathanany ýykyp-da, üç günde saljak Sen,

³⁰haçdan aşak in-de, Özüňi halas et!» diýişýärdiler.

³¹Şonuň ýaly, baş ruhanylar bilen kanunçylar-da Isany masgaralap, biri-birlerine: «Özgeleri halas etdi, ýöne Özüni halas edip bilmeýär.

³²Biz görüp iman eder ýaly, Ysraýylyň Patyşasy Mesih häzir haçdan aşak insin» diýişýärdiler. Onuň bilen bile haça çüýlenenler-de Oňa sögýärdiler.

³³Günortan bütin ýurda garaňky düşüp, üç sagatlap dowam etdi.

³⁴Öýlän sagat üçde Isa gaty ses bilen gygyryp: «Elohi, Elohi! Lama sabaktani?» ýagny: «Hudaýym, Hudaýym! Näme üçin Meni terk etdiň?» diýdi.

³⁵Ol ýerde duranlaryň käbiri muny eşidenlerinde: «Ine, Ylýasy çagyrýar» diýişdiler.

³⁶Biri ylgap, bir gubkany sirkeden dolduryp, gamşyň başyna dakdy-da, içirjek bolup, Isa uzadyp: «Duruň göreliň, Ylýas Ony aşak indermäge gelermikä?» diýdi.

³⁷Emma Isa gaty gygyryp jan berdi.

³⁸Ybadathananyň tutusy ýokardan aşaklygyna ýyrtylyp, ikä bölündi.

³⁹Isanyň garşysynda duran ýüzbaşy Onuň şeýle gygyryp jan berenini görende: «Bu Adam, dogrudan hem, Hudaýyň Ogly eken» diýdi.

⁴⁰Ol ýerde uzakdan seredişip duran aýallar hem bardy. Hem magdalaly Merem hem-de kiçi Ýakupdyr Iosesiň ejesi Merem we Salome olaryň arasyndady.

⁴¹Bular Isa Jeliledekä yzyna düşüp, Oňa hyzmat edýärdiler. Ol ýerde Onuň bilen bile Iýerusalime gelen başga köp aýallar hem bardy.

⁴²Agşam düşende, Taýýarlyk güni, ýagny Sabatdan bir gün öň bolany üçin,

⁴³Mejlisiň sylanýan agzasy, Hudaýyň Patyşalygyna garaşyp ýören arimatiýaly Ýusup Pilatusyň ýanyna barmaga batyrlyk edip, ondan Isanyň jesedini diledi.

⁴⁴Pilatus Onuň eýýäm ölenine geň galdy, ýüzbaşyny çagyryp: «Ölenine köp wagt boldumy?» diýip sorady.

⁴⁵Muny ýüzbaşydan bilensoň, jesedi Ýusuba berdi.

⁴⁶Ol hem kepen mata satyn aldy, jesedi aşak inderip, kepene dolady-da, gaýada oýulan bir mazarda jaýlap, mazaryň agzyna hem bir daş togalady.

⁴⁷Magdalaly Merem bilen Iosesiň ejesi Merem Onuň nirede jaýlananyny gördüler.