Zebur 102

¹Derde batan we arzyny Rebbiň öňüne dökýän görgüliniň dogasy

²Ýa Reb, dogamy eşit, Saňa ýetsin meniň perýadym.

³Kyn günümde menden ýüzüňi sowma, gulak goý maňa, çagyran günümde maňa tizräk jogap bersene.

⁴Çünki günlerim tüsse deý ýitýär, süňklerim tutaşan odun dek ýanýar.

⁵Ýüregim ýaraly, ot dek gurady, mende çörek iýmäge ysgyn galmady.

⁶Iňňildimiň zaryndan ýaňa, meniň derim süňklerime ýapyşýar.

⁷Men çöl-beýewandaky bir hüwi ýaly, harabalykdaky bir baýguş ýaly.

⁸Gözüme asla gelmeýär uky, men üçekdäki ýalňyz guşjagaz ýaly.

⁹Uzakly gün duşmanlarym meni ýaňsylaýarlar, üstümden gülýänler adymy näletleýärler.

¹⁰Seniň gahar-gazaplaryň zerarly, küli çörek kimin iýýärin, gözýaşlarym garylan içgi içýärin.

¹¹Sen meni göterip, gyra taşladyň.

¹²Agşam kölegesi deý meniň günlerim, men ot kimin saralyp soldum.

¹³Sen bolsa, ýa Reb, tagtda otyrsyň baky, Seniň adyň dowam eder nesillerboýy.

¹⁴Sen galkarsyň, Siýona rehim edersiň, çünki oňa merhemet etmek wagtydyr; ýetip geldi bellenen wagt.

¹⁵Seniň bendeleriň onuň daşlaryny eziz görýärler, onuň weýranlygyna haýpy gelýärler.

¹⁶Milletler gorkar Rebbiň adyndan, dünýä şalary gorkar Onuň şan-şöhratyndan.

¹⁷Sebäbi Reb Siýony gaýtadan gurar, şan-şöhratynda Ol peýda bolar.

¹⁸Dykgat berer pukaranyň dogalaryna, äsgermezlik etmez olaryň doga-dilegne.

¹⁹Indi doguljaklar Rebbi şöhratlar ýaly, goý, bu geljek nesil üçin ýazgy edilsin.

²⁰Çünki tussaglaryň ahy-zaryny eşitmek üçin, ölüme höküm edilenleri boşatmak üçin,

²¹Reb mukaddes belentliginden aşak seretdi, Ol göklerden ýere nazar aýlady.

²²Ol halklar, şalyklar Rebbe sežde etmäge üýşenlerinde,

²³Siýonda Rebbiň adyny, Iýerusalimde şan-şöhratyny yglan etsinler diýip, şulary etdi.

²⁴Ol orta ýolda meni tapdan düşürdi, Ol meniň günlerimi gysgaltdy.

²⁵Diýýärin: «Eý, meniň Hudaýym, ömrümiň ýarynda dünýäden alma. Seniň ýyllaryň dowam edýär nesillerboýy».

²⁶Sen gadymyýetde ýeriň binýadyn tutduň, gökler hem Seniň elleriňiň işidir.

²⁷Olar ýitip gider, Sen bolsa dowam edersiň, olar köne eginbaş kimin dargap giderler; Sen olary eginbaş kimin çalşarsyň, olar geçip giderler.

²⁸Emma Seniň şol öňküligiň, soňy ýokdur Seniň ýyllaryň. [29] Seniň bendeleriňiň çagalary asuda ýaşar, olaryň zürýatlary huzuryňda berkarar bolar.