Zebur 119

¹Kämil ýoldan ýöreýänler, Rebbiň kanunyna görä ýaşaýanlar bagtlydyr!

²Onuň düzgünlerini saklaýanlar, tutuş kalby bilen Ony agtarýanlar bagtlydyr!

³Olar nähak işi etmeýär, olar Onuň ýollaryndan ýöreýär.

⁴Buýruklaryňy yhlasly berjaý etmegi, Sen emr etdiň.

⁵Parzlaryňy berjaý ederim ýaly, hernä üýtgemesedi meniň ýollarym.

⁶Şonda tabşyryklaryňa nazar salanymda, men utanmaryn.

⁷Adalatly hökümleriňi öwrenen çagym, päk ýürekden Saňa öwgi aýdaryn.

⁸Seniň parzlaryňy berjaý ederin, bütinleý terk etmegin meni. ב

⁹Ýaş ynsan ýoluny nädip päk saklap biler? Ony Seniň sözüňe görä goramak bilen.

¹⁰Seni agtarýaryn tutuş ýüregim bilen, meni tabşyryklaryňdan azaşdyrma Sen.

¹¹Saňa garşy günä etmäýin diýip, Seniň wadaňy ýüregimde aýap sakladym.

¹²Ýa Reb, Saňa alkyşlar bolsun! Maňa öwret Sen Öz parzlaryňy.

¹³Agzyňdan çykan adalatly hökümleriň baryny, men dilim bilen yglan edýärin.

¹⁴Seniň düzgünleriňden lezzet alýaryn, göýä ähli baýlyga eýe bolan ýaly bolýaryn.

¹⁵Buýruklaryň barada men oýlanaryn, Seniň ýollaryňa dykgat bererin.

¹⁶Parzlaryňdan lezzet alaryn, Seniň sözüňi men unutmaryn. ג

¹⁷Ýaşap, sözüňi saklap bilerim ýaly, Sen bendäňe et jomartlygy.

¹⁸Kanunyňyň ajaýyplygyny görerim ýaly, Sen aç meniň gözlerimi.

¹⁹Men bir gelmişek ýeriň ýüzünde, Öz tabşyryklaryňy gizleme menden.

²⁰Adalatly hökümleriňe bolan küýsegim, elmydama pagyş-para edýär meniň ýüregim.

²¹Sen käýeýärsiň tabşyryklaryňdan azaşanlara: tekepbirlere hem-de lagnatlylara.

²²Utanç bilen betnamlygy Sen menden aýyr, çünki düzgünleriňi men saklandyryn.

²³Hökümdarlar oturyp, maňa garşy dil birikdirýär, bendäň bolsa parzlaryň barada oý-pikire batýar.

²⁴Seniň düzgünleriň – keýpiköklügim, olar meniň – geňeşdarlarym. ד

²⁵Meniň janym gara ýere ýapyşýar, Öz sözüňe laýyklykda maňa ber ömri.

²⁶Men beýan edenimde öz ýollarymy, Sen maňa berdiň jogaby; öwret maňa Öz parzlaryňy.

²⁷Maňa düşündir Öz düzgünleriňiň ýoluny, ajaýyp işleriň barada men oýlanaýyn.

²⁸Gaýgy-gamdan ýaňa janym basylýar, Öz sözüňe laýyklykda maňa kuwwat ber.

²⁹Ýalan ýollary menden uzak et, merhemetiň bilen maňa kanunyňy öwret.

³⁰Wepalylyk ýoluny men saýlap aldym, Seniň adalatly hökümleriňi öňümde goýdum.

³¹Ýa Reb, düzgünleriňden mäkäm ýapyşdym, Sen meni utanja goýma.

³²Tabşyryklaryňyň ýolundan ylgaýaryn men, çünki Sen kalbymyň düşünjesini giňeltdiň. ה

³³Ýa Reb, parzlaryňyň ýoluny öwret, men ony ahyra çenli saklaryn.

³⁴Maňa düşünje ber kanunyňy berjaý ederim ýaly, ony tutuş ýüregim bilen saklarym ýaly.

³⁵Tabşyryklaryňyň ýolundan Sen meni ýöret, çünki men ondan alýaryn lezzet.

³⁶Diňe öz bähbidimi aramaz ýaly, Öz düzgünleriňe tarap öwür ýüregimi.

³⁷Boş hysyrdylardan sow gözlerimi, Öz ýollaryňda maňa ber ýaşaýyşy.

³⁸Özüňden gorkýanlara berdiň wadany: men–bendäň babatda hem tassykla ony.

³⁹Menden sow gorkýan masgaralygymy, çünki ýagşydyr Seniň adalatly hökümleriň.

⁴⁰Jan-tenden küýseýärin buýruklaryňy, Öz dogrulygyňda maňa ber ýaşaýyşy. ו

⁴¹Ýa Reb, Öz beren wadaňa görä, wepaly söýgiň gelsin, halas et meni.

⁴²Şonda özümi ýaňsylanlara jaýdar jogap bererin, çünki Seniň sözüňe bil baglaýandyryn.

⁴³Hakykat sözüni bütinleý alma agzymdan, çünki adalatly hökümleriňe umyt baglaýandyryn.

⁴⁴Men dyngysyz, baky, ebedi Seniň kanunyňy berjaý ederin.

⁴⁵Men Seniň buýruklaryňy agtardym, şonuň üçin erkanalykda gezerin.

⁴⁶Şalaryň öňünde düzgünleriňi aýdaryn, hiç utanmaryn.

⁴⁷Seniň tabşyryklaryňdan lezzet alýaryn, çünki olary men söýýändirin.

⁴⁸Tabşyryklaryňy söýüp, olara tarap ellerimi gerýärin, parzlaryň barada oýa batýaryn. ז

⁴⁹Öz bendäňe beren sözüňi ýatla, ol arkaly umyt berensiň maňa.

⁵⁰Ol darygan günümde meniň tesellim, çünki Seniň wadaň maňa ýaşaýyş berýär.

⁵¹Tekepbirler meni köp ýaňsylaýar, şonda-da kanunyňdan ýüz öwürmeýän.

⁵²Gadymy adalatly hökümleriň barada oýlananymda, ýa Reb, men tapýaryn teselli.

⁵³Kanunyňy terk edýän erbetleri görenimde, gahar-gazap gurşaýar meni.

⁵⁴Gelmişek bolup ýaşan her bir ýerimde, Seniň parzlaryň aýdymym boldy.

⁵⁵Ýa Reb, Seni gijesine men ýatlaýaryn, Seniň kanunyňy berjaý edýärin.

⁵⁶Men şeýle durmuşy amal edýärin: buýruklaryňy berjaý edýärin. ח

⁵⁷Reb – meniň paýym Seniň sözüňi saklamagy men wada etdim.

⁵⁸Tutuş kalbym bilen Saňa ýalbarýaryn: «Öz wadaňa görä, maňa merhemet eýle».

⁵⁹Öz ýollarym barada oýlananymda, gadamymy düzgünleriňe tarap öwürdim.

⁶⁰Tabşyryklaryňy berjaý etmeklik üçin alňasap, olary gijikdirmedim.

⁶¹Erbetleriň tanaplary maňa duzak bolsa-da, Seniň kanunyňy men unutmadym.

⁶²Seniň hökümleriň adalatlydygy üçin, ýary gije turup, Saňa öwgi aýdýaryn.

⁶³Senden gorkýanlaryň baryna, buýruklaryňy berjaý edýänleriň baryna hemra bolýaryn.

⁶⁴Ýa Reb, ýeriň ýüzi wepaly söýgiňden doly, maňa öwret Öz parzlaryňy. ט

⁶⁵Ýa Reb, wadaňa görä, Öz bendäňe etdiň Sen ýagşylygy.

⁶⁶Maňa öwret paýhas bilen bilimi, çünki tabşyryklaryňa men iman etdim.

⁶⁷Ejir çekmezden öň men azaşypdym, emma indi Seniň sözüňi berjaý edýärin.

⁶⁸Sen ýagşysyň, edýärsiň ýagşylyklary, maňa öwret Öz parzlaryňy.

⁶⁹Tekepbirler maňa myjabat atýar, men bolsa tutuş kalbym bilen buýruklaryňy berjaý edýärin.

⁷⁰Olaryň ýürekleri daşa öwrüldi, hiç zat duýmaýar, men bolsa kanunyňdan lezzet alýaryn.

⁷¹Seniň parzlaryňy öwrenmek üçin, ejir çekenim maňa ýagşylyk boldy.

⁷²Seniň agzyňyň sözlän kanuny maňa müňlerçe altyn-kümüşden gowy. י

⁷³Seniň elleriň meni ýaradyp, maňa durk berdi, tabşyryklaryňy öwrenerim ýaly ber düşünjäni.

⁷⁴Senden gorkýanlar meni görüp şatlanar, çünki Seniň sözüňe umyt bagladym.

⁷⁵Ýa Reb, bilýärin: adyldyr Seniň hökümleriň, wepalylygyň sebäpli maňa ejir çekdirdiň.

⁷⁶Öz bendäňe beren wadaňa görä, wepaly söýgiň maňa teselli bolsun.

⁷⁷Rehim et, goý, men ýaşaýyn çünki kanunyň – keýpiköklügim.

⁷⁸Tekepbirler, goý, utanja galsyn, çünki olar nähak ýere şyltak atdylar, men bolsa buýruklaryň barada oýa bataryn.

⁷⁹Senden gorkýanlar düzgünleriňi bileri ýaly, goý, olar maňa öwrülsin.

⁸⁰Utanja galmazym ýaly, kalbym parzlaryňda, goý, kämil bolsun. כ

⁸¹Halas edişiňe intizar bolup, janym örtenýär, men Seniň sözüňe umyt baglaýan.

⁸²Seniň wadaňa intizar meniň gözlerim, «Haçan teselli berersiň?» diýip soraýan.

⁸³Tüsseden zaýalanan meşik deý boldum, emma Seniň parzlaryňy men unutmadym.

⁸⁴Seniň bendäň garaşmaly haçana çenli? Aňtaýjylaryma haçan çykarjak Sen hökümiňi?

⁸⁵Tekepbirler maňa çukur gazdylar, olar Seniň kanunyňa görä ýaşamaýarlar.

⁸⁶Seniň tabşyryklaryňyň bary ygtybarlydyr, maňa kömek et, olar nähak ýere azar berýärler.

⁸⁷Olar meni tas ýok edipdi ýeriň ýüzünden, şonda-da buýruklaryňy men terk etmedim.

⁸⁸Agzyňyň düzgünlerini saklap bilerim ýaly, Öz wepaly söýgiňde maňa ber ýaşaýyşy. ל

⁸⁹Ýa Reb, Seniň sözüň göklerde baky berkarar boldy.

⁹⁰Wepalylygyň dowam edýär nesillerboýy, Sen dünýäni gurduň, ol hem mäkäm dur.

⁹¹Ähli zat şu güne çenli belleýşiň dek dur, çünki olar Saňa gulluk edýärler.

⁹²Eger kanunyň keýpiköklügim bolmadyk bolsa, ýok bolup giderdim gaýgy-gamymda.

⁹³Asla unutmaryn buýruklaryňy, çünki olar arkaly berdiň maňa ýaşaýşy.

⁹⁴Men Seniňki, meni halas et, çünki buýruklaryňa berdim men dykgat.

⁹⁵Erbetler meni ýok etjek bolup, bukuda ýatýar, men bolsa düzgünleriň barada pikire batýan.

⁹⁶Gördüm ähli kämillikleriň çäklidigini, emma Seniň tabşyryklaryň çendenaşa giň. מ

⁹⁷Seniň kanunyňy juda söýýärin! Ol uzakly gün meniň oýlanmalarym.

⁹⁸Seniň tabşyrygyň meni duşmandan paýhasly edýär, çünki ol elmydama meniň aňymda.

⁹⁹Ähli halypalarymdan paýhasly boldum, çünki Seniň düzgünleriň – oýlanmalarym.

¹⁰⁰Ýaşululardan-da köp aňlaýandyryn, çünki buýruklaryňy berjaý edýärin.

¹⁰¹Seniň sözüňi saklamak üçin, ähli ýaman ýoldan men gaça durdum.

¹⁰²Seniň hökümleriňden ýüz öwürmedim, çünki maňa Sen tälim berdiň.

¹⁰³Seniň wadaň maňa nähili süýji! Ol agzyma baldan-da süýji!

¹⁰⁴Buýruklaryň arkaly boldum paýhasly, şonuň üçin ýigrenýärin her ýalan ýoly. נ

¹⁰⁵Seniň sözüň – çyra aýaklaryma, ol – ýagtylyk meniň ýodama.

¹⁰⁶Adalatly hökümleriňi berjaý ederin diýip, men kasam etdim we berjaý etdim.

¹⁰⁷Men jebir-jepalar çekdim; Ýa Reb, Öz wadaňa görä ber ýaşaýyşy.

¹⁰⁸Ýa Reb, gurbanlyk hökmünde kabul et alkyşlarymy hem-de öwret maňa adalatly hökümleriňi.

¹⁰⁹Janym dyngysyz howp astynda bolsa-da, Seniň kanunyňy unutmaýaryn.

¹¹⁰Erbetler maňa duzak gursa-da, Seniň buýruklaryňdan azaşmaýaryn.

¹¹¹Seniň düzgünleriň – baky mirasym, çünki olar meniň ýürek şatlygym.

¹¹²Seniň parzlaryňy berjaý etmegi ýüregime düwdüm baky, ahyra çenli. ס

¹¹³Ikiýüzlüleri men ýigrenýärin, Seniň kanunyňy bolsa söýýärin.

¹¹⁴Sen meniň gizlenýän ýerim hem-de galkanym, men Seniň sözüňe umyt baglaýaryn.

¹¹⁵Eý, betkärler, menden aýrylyň, men Hudaýyň tabşyryklaryny berjaý edeýin.

¹¹⁶Wadaňa görä meni söýgetle, goý, men ýaşaýyn, öz umydymdan hiç utanmaýyn.

¹¹⁷Maňa daýanç bol, halas bolaýyn, parzlaryňa elmydama dykgat bereýin.

¹¹⁸Parzlaryňdan azaşanlary Sen ret edýärsiň, çünki olaryň hilesi puçdur.

¹¹⁹Çöp-çör kimin taşlaýarsyň ýer ýüzündäki ähli erbetleri, şoňa üçin men söýýärin düzgünleriňi.

¹²⁰Seniň wehimiňden titreýär tenim, men gorkýaryn hökümleriňden. ע

¹²¹Adalatly we hak işleri etdim, meni sütemkärlerimiň eline berme.

¹²²Kepillendir Öz bendäňiň abadanlygyny, tekepbirler ezmesin meni.

¹²³Halas edişiňe, dogry wadaňyň berjaý bolmagyna meniň gözlerim intizar galdy.

¹²⁴Bendäňe wepaly söýgiňde gara, parzlaryňy öwret Sen maňa.

¹²⁵Men Seniň bendäň, paýhas ber maňa, akyl ýetireýin düzgünleriňe.

¹²⁶Indi Rebbiň hereket etmeli wagty, çünki ynsanlar bozdular Seniň kanunyňy.

¹²⁷Men welin altyndan, sap altyndan-da köp söýýärin Seniň tabşyryklaryňy.

¹²⁸Dogry saýýaryn ähli buýruklaryňy, ýigrenýärin her ýalan ýoly. פ

¹²⁹Ajaýypdyr Seniň düzgünleriň, şonuň üçin olary berjaý edýärin.

¹³⁰Sözleriňiň beýany ýagtylyk berýär, sada ynsanlara düşünje berýär.

¹³¹Tabşyryklaryňa bolan küýsegden ýaňa, agzymy açamda-da, howa ýetmeýär maňa.

¹³²Adyňy söýýänlere edişiň ýaly, nazar salyp, maňa merhemet eýle.

¹³³Öz wadaňa görä mäkäm et ädimlerimi, hiç bir ýamanlyk üstümden höküm sürmesin.

¹³⁴Ynsan süteminden azat et meni, men Seniň buýruklaryňy berjaý edeýin.

¹³⁵Bendäňiň üstüne saç ýüzüň nuruny, maňa öwret Öz parzlaryňy.

¹³⁶Gözlerimiň ýaşy sil deýin akýar, çünki ynsanlar berjaý etmeýär Seniň kanunyňy. צ

¹³⁷Ýa Reb, Sen – dogry, Seniň hökümleriň hem adalatly.

¹³⁸Seniň buýran düzgünleriň adyl hem-de juda wepaly.

¹³⁹Yhlasym meni ýakyp-ýandyrýar, çünki duşmanlarym unudýar Seniň sözüňi.

¹⁴⁰Seniň wadaň örän ygtybarlydyr, Seniň bendäň ony söýýändir.

¹⁴¹Äsgerilmän, kemsidilsem-de, unutmaýaryn buýruklaryňy.

¹⁴²Seniň dogrulygyň – baky dogrulyk, Seniň kanunyň hem hak.

¹⁴³Muşakgat we külpet üstüme indi, şonda-da tabşyryklaryňdan lezzet alýaryn.

¹⁴⁴Seniň düzgünleriň dogry asyrlarboýy, maňa paýhas ber, goý, men ýaşaýyn. ק

¹⁴⁵Tutuş ýüregim bilen perýat edýärin, Ýa Reb, maňa jogap ber, men parzlaryňy berjaý edeýin.

¹⁴⁶Seni çagyrýaryn, meni halas et, düzgünleriňi berjaý edeýin.

¹⁴⁷Gün dogmanka turup, perýat edýärin, Seniň sözüňe umyt baglaýaryn.

¹⁴⁸Seniň wadaň barada oýlanmak üçin, gözlerim uzakly gijäni oýa geçirdi.

¹⁴⁹Öz wepaly söýgiňe görä eşit sesimi, ýa Reb, adalatyňa görä maňa ber ýaşaýyşy.

¹⁵⁰Meni ýaman niýet bilen yzarlaýanlar ýakyna geldi, olar Seniň kanunyňdan uzakdadyrlar.

¹⁵¹Emma Sen ýakynsyň, ýa Reb. Seniň tabşyryklaryň ählisi hakdyr.

¹⁵²Bilýärdim ozaldan bäri: Seniň düzgünleriň baky berkarar. ר

¹⁵³Jebir-jepamy gör-de, halas et meni, çünki unutmaýan men kanunyňy.

¹⁵⁴Hakymy alyp ber, azat et meni, wadaňa görä maňa ber Sen ýaşaýyşy.

¹⁵⁵Halas bolardan uzakdyr erbetler, çünki olar agtarmaýar Seniň parzlaryňy.

¹⁵⁶Ýa Reb, ägirt Seniň rehimiň, maňa adalatly hökümleriňe görä ber ýaşaýyşy.

¹⁵⁷Meni aňtaýanlar hem-de duşmanlarym köp, emma şonda-da düzgünleriňden çykýan däldirin.

¹⁵⁸Ýigrenç bilen garaýaryn men dönüklere, olar buýruklaryňy berjaý etmeýär.

¹⁵⁹Gör, nähili söýýärin buýruklaryňy! Wepaly söýgiňe görä ber ýaşaýyşy.

¹⁶⁰Ýa Reb, hakykatdyr Seniň sözleriň! Adalatly hökümleriňiň bary asyrlarboýy. ש

¹⁶¹Şazadalar meni nähak ýere aňtaýar, emma ýüregim Seniň sözüňden gorkýar.

¹⁶²Uly hazyna edinen kimin, Seniň wadaňa begenýärin men.

¹⁶³Ýalany ýigrenip, nejis saýýaryn, men Seniň kanunyňy söýýärin.

¹⁶⁴Seniň adalatly hökümleriň üçin, günde ýedi gezek Seni şöhratlandyrýaryn.

¹⁶⁵Uly abadanlyk bar kanunyňy söýýänler üçin, olar asla büdremez.

¹⁶⁶Ýa Reb, halas edişiňe umyt baglaýaryn, tabşyryklaryňy berjaý edýärin.

¹⁶⁷Kalbym berjaý edýär düzgünleriňi, men olary juda söýýärin.

¹⁶⁸Berjaý edýärin buýruklaryňy, düzgünleriňi, çünki meniň ähli ýollarym mälimdir Saňa. ת

¹⁶⁹Ýa Reb, perýadym, goý, Saňa ýetsin, Öz wadaňa görä maňa düşünje ber.

¹⁷⁰Ýalbaryşym, goý, Saňa ýetsin, Öz wadaňa görä meni halas et.

¹⁷¹Dilim öwgüler saçar, çünki maňa parzlaryňy öwretdiň;

¹⁷²dilim Seniň wadaňy nagma ediner, çünki tabşyryklaryňyň ählisi dogry.

¹⁷³Seniň eliň maňa, goý, ýardam bersin, çünki tabşyryklaryňa tabyn bolmagy men karar etdim.

¹⁷⁴Ýa Reb, halas edişiňi küýseýärin men, Seniň kanunyňdan lezzet alýaryn.

¹⁷⁵Goý, köňlüm ýaşasyn, Seni şöhratlandyrsyn, Seniň adalatly hökümleriň maňa, goý, kömek bersin.

¹⁷⁶Ýiten goýun kimin azaşdym, gözle bendäňi, çünki tabşyryklaryňy unutmaýaryn.