Zebur 148

¹Rebbe şan-şöhrat bolsun! Göklerden Rebbi şöhratlandyryň, belentliklerde Ony şöhratlandyryň!

²Eý, ähli perişdeleri, Ony şöhratlandyryň! Eý, ähli gögüň goşunlary, Ony şöhratlandyryň!

³Eý, Gün we Aý, Ony şöhratlandyryň! Eý, ähli nurly ýyldyzlar, Ony şöhratlandyryň!

⁴Eý, gökleriň gökleri, eý, gökleriň üstündäki suwlar, Ony şöhratlandyryň!

⁵Goý, olar Rebbi şöhratlandyrsyn! Çünki Ol buýurdy, olar emele geldi.

⁶Reb olary baky, müdimi berkarar etdi, hiç üýtgemejek bir parzy berdi.

⁷Eý, zeminde ýaşaýanlar, Rebbi şöhratlandyryň: eý, deňiz läheňleri, çuňluklaryň ählisi,

⁸eý, ot we doly, gar we duman, Onuň sözüni berjaý edýän tupan ýelleri,

⁹eý, daglar we baýyrlaryň ählisi, miweli agaçlar, kedr daragtlaryň ählisi,

¹⁰eý, haýwanlar we ähli mal-gara süýrenijiler we guşlar,

¹¹eý, ýer ýüzüniň şalary, ähli halky, şazadalar, dünýäniň ähli hökümdarlary,

¹²eý, ýaş gyzlar hem-de ýigitler, ýaşulular hem-de çagalar.

¹³Goý, olar Rebbiň adyny şöhratlandyrsyn, çünki diňe Onuň ady beýgeldilendir, Onuň şan-şöhraty ýerden-gökden belentdir.

¹⁴Ol Öz halkynyň kuwwatyny artdyrdy, şoňa görä, eý, Onuň ähli sadyklary, Oňa ýakyn bolan ysraýyl halky, Rebbe şan-şöhrat bolsun!