Zebur 18

¹Aýdymçylar toparynyň ýolbaşçysyna. Rebbiň guly Dawudyň mezmury. Reb ony ähli duşmanlarynyň we Şawulyň elinden halas eden güni ol bu nagmanyň sözlerini Rebbe ýüzlenip aýtdy:

²Seni söýýärin, ýa Reb – kuwwatym.

³Reb meniň gaýam, galam hem Halasgärim, Hudaýym – pena edinýän gaýam, galkanym, ýeňşim hem-de berkitmäm.

⁴Men şan-şöhrata mynasyp Rebbi çagyrýaryn, hem-de duşmanlarymdan halas bolýaryn.

⁵Ölüm tanaplary maňa oraldy, weýrançylyk silleri meni garbady.

⁶Ölüm dünýäsiniň tanaplary maňa saraldy, ölüm duzaklary garşymdan çykdy.

⁷Gam-gussamyň içinde Rebbi çagyrdym, öz Hudaýyma men perýat etdim. Ol ybadathanasyndan meniň sesimi eşitdi; Onuň gulagyna perýadym ýetdi.

⁸Şonda ýer çaýkandy hem endiredi, daglar binýatlary sarsyp, lerzana geldi, sebäbi Reb gazaba mündi.

⁹Gazabyndan ýaňa tüsse çykdy burnundan, ýuwudyjy ot bilen köreýän közler çykdy agzyndan.

¹⁰Ol gökleri böwsüp, aşaga indi, zulmat aýaklarynyň astynda bardy.

¹¹Ol bir keruba mündi-de, uçdy, ýeliň ganatlarynda gaýdy.

¹²Ol Özüniň daşyna örtgi etdi tümlügi, telär etdi goýy bulutlaryň ýagmyr tümüni.

¹³Huzurynyň ýalkymyndan ýaňa köreýän közlerdir doly böwsüp geçdi Onuň gara bulutlaryny.

¹⁴Reb göklerde güňleç gürledi, Beýik Hudaý sesini közdür doly bilen çykardy.

¹⁵Peýkamlaryny atyp, pytratdy ýagylaryny, ýyldyrymlar çakdyryp, weýran etdi olary.

¹⁶Şonda, ýa Reb, Seniň käýinjiňden, burnuňdan çykan demiňden ýaňa, deňziň geçelgeleri göründi, dünýäniň-de binýatlary açyldy.

¹⁷Ol belentden ýetdi hem meni aldy Ol meni çuň suwlardan çekip çykardy.

¹⁸Halas etdi meni ýigrenýän güýçli ýagymdan, çünki olar güýçlüdi menden.

¹⁹Olar betbagt günümde garşyma çykdy, ýöne Reb meniň daýanjym boldy.

²⁰Meni giň ýere çykardy hem halas etdi, çünki Ol menden göwnühoş boldy.

²¹Ol dogrulygyma laýyk öwezini gaýtardy, ellerimiň tämizligine laýyk Ol sylaglady.

²²Çünki men Rebbiň ýollaryndan ýöredim, Hudaýymdan aýrylmak ýaly erbet işi men etmedim.

²³Çünki gözümiň alnyndady ähli kararlary, özümden daşlaşdyrmandym Onuň parzlaryny.

²⁴Men kämildim Onuň öňünde, sakladym özümi günä etmekden.

²⁵Şonuň üçin, dogrulygyma we ellerimiň päkligine görä, Reb öwezini gaýtardy Öz nazarynda.

²⁶Wepalylyk edýärsiň Sen wepalylara, kämillik edýärsiň Sen kämillere,

²⁷päklik edýärsiň Sen päk ynsanlara, egrilere bolsa egriligine görä garaýarsyň Sen.

²⁸Pesgöwünli halky halas edýärsiň, emma tekepbir gözleri peseldýärsiň Sen.

²⁹Ýa Reb, çyrama nur berýän Sensiň, Hudaýym ýagtyldýar meniň tümlügmi.

³⁰Seniň bilen talaňçylara hüjüm ederin, Öz Hudaýym bilen diwardan aşyp bilerin.

³¹Hudaý – Onuň ýoly kämildir, Rebbiň sözleri sapdyr, Ony pena edinýänleriň baryna Reb galkandyr.

³²Çünki Rebden başga Hudaý ýok! Hudaýymyzdan başga gaýa ýok!

³³Ol meni kuwwata besleýän Hudaý, Ol meniň ýolumy aýypsyz edýär.

³⁴Aýaklarymy keýigiňki dek edýär, belent ýerlerde meni ykjam duruzýar.

³⁵Urşa türgen edýär Ol ellerimi, gollarym egreldýär bürünçden ýaýy.

³⁶Ýeňiş galkanyňy maňa berýärsiň, Seniň goluň meni goldaýar, Seniň kömegiň-de meni beýgeldýär.

³⁷Gadamlarymyň astyndaky ýoly giňeldýäň, meniň aýaklarym taýmaýar.

³⁸Duşmanlarymy kowalap, yzlaryndan ýetýärin, olary gyryp tükedýänçäm, dolanmaýaryn.

³⁹Men olary derbi-dagyn edýärin, galyp bilmeýär, aýaklarymyň astyna olar ýykylýar.

⁴⁰Uruş üçin Sen bilime kuwwat berýärsiň, garşyma çykanlary maňa tabyn edýärsiň.

⁴¹Boýun egdirýärsiň duşmanlarymy, gyrýaryn men özümi ýigrenýänleri.

⁴²Perýat etseler-de, olary halas edýän ýok; Rebbi çagyrsalar-da, Ol jogap berenok.

⁴³Olary owradyp, tozan dek ýele sowurýaryn, köçeleriň palçygy kimin taşlaýaryn.

⁴⁴Söweşjeň goşundan meni halas eýleýäň, Sen meni milletlere baş edip goýýaň, tanamadyk halkym tabyndyr maňa.

⁴⁵Meni eşiden dessine boýun bolýarlar, ýatlar maňa ýalym-ýulum edýärler.

⁴⁶Kesekileriň ýüzi gorkudan ak tama dönýär, olar galalaryndan titreşip çykýar,

⁴⁷Reb diridir! Meniň Gaýam alkyşly bolsun! Gutulyşymyň Hudaýy belende çykarylsyn!

⁴⁸Ol meniň arymy alyp berýän Hudaýdyr, Ol halklary maňa tabyn edýändir,

⁴⁹Ol meni duşmanlarymdan halas eýleýär. Sen meni ýagylarymdan üstün çykardýarsyň, hem-de meni zalymdan halas edýärsiň.

⁵⁰Munuň üçin, ýa Reb, milletler arasynda Saňa öwgi aýdaryn, men Seniň adyňa nagma aýdaryn. [51] Ol Öz şasyna beýik ýeňişler berýär, seçip saýlan Dawudyna, onuň nesline elmydama wepaly söýgüsini görkezýär.