Zebur 37

¹Erbet iş edýänlere janyňy ýakma, naýynsaplara höwesli bakma.

²Çünki olar tiz wagtda ot kimin gurar, gök ösümlik kimin saralyp solar. ב

³Rebbe bil bagla, et sen ýagşylyk, ýurtda ýaşap, ýaýna asudalykda.

⁴Rebden teselli tap, ýürek arzuwlaryňy Ol hasyl eder. ג

⁵Ýoluňy Rebbe tabşyr, Oňa bil bagla, şonda Ol saňa hemaýat berer.

⁶Nur deý ýalpyldadar dogrulygyňy, günorta çagy deý – haklylygyňy. ד

⁷Ümsüm bol Rebbiň öňünde, Oňa sabyrly garaş, ýoly rowaç betniýete höwesli bakma. ה

⁸Gahardan saklan, gazaby taşla, aladaçyl bolma: ol şere elter.

⁹Çünki kesilip taşlanar erbetlik edýänler, Rebbe intizarlar ýeri miras alarlar. ו

¹⁰Az-kem sabyr et, erbetler ýok bolarlar, ýerlerine göz aýlarsyň, ýöne tapmarsyň.

¹¹Päli pes adamlar bolsa ýeri miras alarlar, abadançylykda ýaşap, hezil ederler. ז

¹²Erbet dogry adama hyýanat edýär hem-de oňa dişlerini gyjaýar.

¹³Taňry bolsa onuň üstünden gülýär, çünki onuň wagtynyň dolýandygny görýär. ח

¹⁴Garyp bilen mätäji ýere çalmaklyk üçin, dogry ýoldan barýanlary öldürmek üçin, erbet adamlar gylyç syryp, ýaýyny gurýar.

¹⁵Emma gylyçlary öz ýüreklerine sanjylar, olaryň ýaýlary hem kül-owram bolar. ט

¹⁶Dogry ynsanyň az zady ähli erbetleriň baýlygyndan ýagşydyr.

¹⁷Çünki erbetleriň gollary döwler, ýöne Reb dogrulary söýgetlär. י

¹⁸Reb kämilleriň günlerini bilýändir, olaryň mirasy ebedi galar.

¹⁹Olar ýaman wagty utandyrylmaz, dok bolarlar açlyk döwründe. כ

²⁰Emma erbetler heläk bolarlar, Rebbiň duşmanlary örüleriň gözelligi deý ýitip giderler, gaýyp bolarlar, tüsse içinde sumat bolarlar. ל

²¹Erbet adam karz alyp, yzyna bermez, dogry ynsan bolsa jomart we eli açyk.

²²Çünki Onuň ýalkanlary ýeri miras alarlar, Onuň garganlary bolsa gyrlyp ýok bolarlar. מ

²³Reb dogrynyň gadamyny berkarar edýär, Ol onuň ýolundan göwnühoş bolýar.

²⁴Ýykylmaz bu ynsan büdräýende hem, çünki Reb onuň elinden tutýar. נ

²⁵Ýaş ýigitdim, indi garradym, ýöne dogry ynsanyň terk edilenini ýa zürýadynyň çörek dilenenini heniz görmedim.

²⁶Elmydama eli açyk hem-de karz berýär; olaryň neslinden ýalkynyş geler. ס

²⁷Şer işden gaça dur hem et ýagşylyk – baky ýaşarsyň. ע

²⁸Çünki Reb adalaty söýýändir, sadyk ynsany Ol terk edýän däldir; dogry ynsan baky goralar, ýöne erbetleriň zürýatlary gyrlyp ýok bolar.

²⁹Dogry ynsanlar ýeri miras alarlar hem-de onda baky mesgen tutarlar. פ

³⁰Dogry adamyň agzy danalygy sözleýär, onuň dili adalaty beýan eýleýär.

³¹Onuň ýüregindedir Hudaýyň kanuny, taýýan däldir onuň aýagy. צ

³²Erbet dogry ynsany aňtaýar, ony öldürmäge pursat peýleýär.

³³Ýöne Reb dogry ynsany erbediň eline bermez; kaza getirilende, ony aýyply çykarmaz. ק

³⁴Rebbe umyt bagla, Onuň ýoluny sakla, Ol hem ýeri miras almagyň üçin seni beýgelder; sen erbetleriň ýok edilenini görersiň. ר

³⁵Men yzgytsyz erbet adamyň çynar dek gögeren ýerinde ýaýrap oturanyny gördüm.

³⁶Birdenkä ol gaýyp boldy-da gitdi; men ony gözledim, emma tapmadym. שׁ

³⁷Kämil ynsany synla, dogry adama seret. Parahat ynsanyň gelejegi bar.

³⁸Emma günäliler bütinleý weýran ediler; erbetleriň gelejegi ýok bolar. ת

³⁹Reb dogry ynsanlary halas edýändir, muşakgatlykda olara pena bolýandyr.

⁴⁰Reb olara kömek berer we halas eder; olary erbetlerden gutarar we halas eder, çünki olar Ony pena tutunýar.