Zebur 38

¹Ýa Reb, gaharyňda meni ýazgarma, gazabyňda meni terbiýeleme.

²Çünki peýkamlaryň parran geçdi içimden, Seniň eliň agram salýar meniň üstümden.

³Gaharyň zerarly tenimiň abat ýeri ýok, günäm zerarly bedenimde saglyk ýok.

⁴Çünki ýazyklarym başymdan agdy, agyr ýük deý maňa agramyn saldy.

⁵Akmaklygym zerarly ýaralarym iriňledi hem-de porsady.

⁶Iki bükülip, ýere ýazyldym, men uzakly gün ýas tutup gezýän.

⁷Çünki ysytmadan doludyr bilim, bedenimiň abat ýeri galmady.

⁸Halys tapdan düşdüm, mydar galmady, ýürek yzasyndan zar-zar gygyrýan.

⁹Ýa Taňry, Saňa aýan ähli dilegim, Senden gizlin däldir meniň perýadym.

¹⁰Ýüregim galpyldap, ysgynym gaçdy, meniň gözlerimiň nury galmady.

¹¹Dost-ýarlarym ýaralarym zerarly menden daşlaşýar, goňşularym-da menden uzakda durýar.

¹²Janymyň kastyndakylar duzak gurýarlar; meniň zelelimi gözleýänler meni ýykmak hakda gürrüň edýärler; uzakly gün hile gurmagy niýet edýärler.

¹³Men bolsa eşidip bilmeýän ker adam ýaly, gürläp bilmeýän lal ynsan ýaly.

¹⁴Dilsiz-agyzsyz ker kimin boldum.

¹⁵Çünki, ýa Reb, men Saňa intizardyryn; Sen jogap berersiň, ýa Taňry meniň Hudaýym.

¹⁶Diýdim: «Duşmanlarym çekýän jebrime, goý, begenmesin, ýykylmaýyn, ýagylarym, goý, öwünmesin».

¹⁷Çünki ýykylmaga golaýlandyryn, dyngysyz agyrym bilen ýüzbe-ýüzdürin.

¹⁸Men öz ýazygymy boýun alýaryn, günäm babatda hasrat çekýärin.

¹⁹Duşmanlarym bolsa diri hem güýçli; meni nähak ýere ýigrenýänler köpeldi.

²⁰Ýagşylygyma ýamanlyk edýänler maňa duşmandyr, çünki ýagşylyga eýerýärin men.

²¹Ýa Reb, meni terk etme! Uzaklaşma menden, eý, meniň Hudaýym!

²²Ýardam etmek üçin dadyma ýetiş, ýa, Taňry meniň Halasgärim!