Zebur 44

¹Eý, Hudaý, gulagymyz bilen eşitdik; atalarymyzyň döwründe, gadym eýýamda olar bize Seniň edenleriň barada gürrüň berdiler.

²Milletleri kowup Öz eliň bilen, Sen atalarymyza ýer berdiň. Halklary wes-weýran edip, Sen atalarymyzy ýaýratdyň.

³Olar ýurdy eýelemediler gylyjy bilen, ýeňşi gazanmadylar gollary bilen – Seniň eliň, goluň, ýüzüňiň nury edendir muny; çünki Sen juda söýdüň olary.

⁴Sensiň meniň Patyşam hem-de Hudaýym. Ýakup üçin ýeňişleri Sen buýur.

⁵Duşmanlarymyzy basgylarys Seniň kuwwatyň bilen, garşydaşlarymyzy depgiläris Seniň adyň bilen.

⁶Men öz ýaýyma bil baglamaýan, meni halas etmeýär meniň gylyjym.

⁷Sensiň bizi halas eden duşmanlarymyzdan, Sensiň bizi ýigrenýänleri utanja goýan.

⁸Uzakly gün Hudaý bilen magtanýarys Seniň adyňa baky şükür ederis. Sela

⁹Ýöne indi bizi taşladyň, utanja goýduň, goşunlarymyz bilen bile gitmeýärsiň Sen.

¹⁰Bizi duşmandan gaçar ýaly etdiň Sen, bizi ýigrenýänler bizi talaýar.

¹¹Bizi goýun kimin iýmäge berdiň, Sen milletler arasynda bizi pytratdyň.

¹²Sen Öz halkyňy haýyrsyz satdyň, olaryň bahasyndan haýyr görmediň.

¹³Goňşy halklaryň öňünde biz ýüzügara, göz-gülban etdiň, töwerek-daşa etdiň masgara.

¹⁴Milletleriň diline düşürdiň bizi, halklar ýaýkaýarlar bize başyny.

¹⁵Myjabat ýöňkeýäniň, dil ýetirýäniň sesinden ýaňa, duşmandan we öç alýandan ýaňa, uzakly gün ryswalygym garşymda, meniň ýüzümi utanç büredi.

¹⁷Başymyza indi bularyň bary, ýöne unudan däldiris Seni, hyýanat etmedik Seniň ähtiňe.

¹⁸Biziň ýüregimiz Senden dänmedi, ädimlerimiz Seniň ýoluňdan çykmady. Sen bolsa bizi şagallar mekanynda kül-peýekun etdiň, ölüm kölegesi bilen Sen bizi örtdüň.

²⁰Eger Hudaýymyzyň adyny unudan bolsak, bir ýat taňra ellerimizi uzadan bolsak,

²¹Hudaýa aýan bolmazmydy bu? Ol bilýär-ä ýürekdäki syrlary!

²²Biz her gün Seniň üçin öldürilýäris, biz damagy çalynjak goýun saýylýarys.

²³Oýan, ýa Taňry, näme üçin uklaýaň? Galk Sen, bizi baky taşlama.

²⁴Näme üçin Sen ýüzüňi gizleýäň, muşakgat bilen hasratymyzy unudýaň?

²⁵Biz gara ýere ýazylyp gitdik, indi toprakdan galyp bilemzok.

²⁶Galk-da, bize kömek et, wepaly söýgiň hatyrasyna bizi halas et.