Zebur 6

¹Ýa Reb, gaharyňda meni ýazgarma, gazabyňda meni terbiýeleme.

²Ýa Reb, maňa merhemet eýle, çünki mende ysgyn-mydar galmady; ýa Reb, maňa ber Sen şypaňy, çünki galpyldaýar meniň süňklerim.

³Güýçli galpyldaýar janym hem meniň. Ýa Reb, haçana çenli bu dowam eder?

⁴Ýa Reb, maňa öwrülip, halas et, meniň janymy, wepaly söýgiňiň hatyrasyna, azat meni.

⁵Çünki Seni gabyrda ýatlamak ýokdur; Saňa ölüler dünýäsinde kim öwgi aýdar?

⁶Iňňildimden halys ýadadym, her agşam aglap, düşegimi suw-sil edýärin, ýorganymy gözýaşlaryma men gark edýärin.

⁷Gözlerimiň nury öçdi gussa zerarly, küteldi ähli duşmanlarym sebäpli.

⁸Menden daşlaşyň, eý, betkärleriň bary, çünki Reb eşitdi agy sesimi.

⁹Reb eşitdi meniň ýalbaryşymy, kabul edýär Reb meniň dogamy.

¹⁰Ähli duşmanlarym utanyp, gorka gaplansyn, aljyrap birbada, yzyna dönsün.