Zebur 7

¹Ýa Beýik Hudaýym! Seni pena edinýärin men, meni yzarlaýanlaryň baryndan halas et, gutar.

²Ýogsam hiç kim ýokka meni halas edere, olar şir dek meni parçalaýmasyn.

³Ýa Reb, Hudaýym, eger şulary men eden bolsam: eger ellerimde haksyzlyk bolsa,

⁴eger özüm bilen asudalykda ýaşana men ýamanlyk edäýen bolsam, duşmanymy sebäpsiz ýere men talan bolsam,

⁵onda, goý, yzarlaýanlar yzymdan ýetsin, depgiläp, janymy ýere gaplasyn hem-de hormatymy aýak astyna salsyn. Sela

⁶Ýa Reb, galk Sen Öz gazabyňda, garşy çyk Sen duşman dergazabyna; eý, Hudaýym, oýan-da, jar et Öz hökümiňi.

⁷Halklar jemagaty gurşasyn töweregiňi, göklerden ýöret olara Sen hökümiňi.

⁸Reb halklara höküm çykarýar; ýa Reb, dogrulygym bilen päkligime görä, Sen meni akla.

⁹Erbet adamlaryň ýamanlygy soňlansyn, berkarar et Sen dogry ynsany, çünki Sen, ýa hak Hudaý, köňüldir ýürekleri barlaýarsyň ahyryn.

¹⁰Hudaýdadyr meniň galkanym, Ol dogry ýüreklini halas edýändir.

¹¹Hudaý adyl Kazydyr, haksyzlygy günde höküm edýändir.

¹²Eger kimdir biri toba etmese, Hudaý Öz gylyjyny ýitelder; ýaýynyň kirşini çekip, ony çenändir.

¹³Ol öwrüp peýkamlaryny lowlaýan oda, oňa ölüm ýaraglaryny taýynlap goýýar.

¹⁴Ynha, erbet adamyň haksyzlykdan hamyla bolup, göwresinde ýamanlygy göterip, ýalany dünýä indirişini gör!

¹⁵Ol gazýar bir çukur, ony çuňaldýar, gazan çukuryna-da onuň özi düşýär.

¹⁶Öz ýamanlygy inýär onuň başyna, zalymlygy inýär öz depesine.

¹⁷Rebbe Onuň haklygynda şükür edýärin, şatlanyp, Beýik Hudaý nagma aýdýaryn.