Zebur 73

¹Dogrudan-da, Hudaý Ysraýyla – ýüregi päk bolanlara ýagşydyr.

²Ýöne tas büdräpdi meniň aýaklarym, tas taýypdy meniň gadamlarym.

³Çünki tekepbirlere göriplik etdim: olar erbetlik edýän-de bolsa, abadan durmuşlarynyň bardygny gördüm.

⁴Çünki olar jebir çekmeýäne meňzeýär, olaryň sagdyn, semiz bedenleri bar.

⁵Olar beýlekiler ýaly azap çekmeýär, beýlekiler ýaly kynçylyga duçar bolmaýar.

⁶Şoňa görä tekepbirlikleri boýunlaryny monjuk kimin bezeýär, zulum olary eginbaş kimin büreýär.

⁷Ýagdan ýaňa gabarýar olaryň gözi, göwün hyýallaryndan dolup-daşýar ýüregi.

⁸Olar ýaňsylaýar, betpäl gürleýär, gopbamsyrap, zulum bilen gorkuzýar.

⁹Olaryň agyzlary göklere hüjüm eýleýär, dilleri bolsa ýerde boş zatlary ýaňraýar.

¹⁰Şonuň üçin Hudaý halky şolara tarap öwrülýär, olaryň gepine gulak gabardýar.

¹¹Tekepbirler diýýär: «Hudaý biläýermikä? Beýik Hudaý mundan habarlymyka?»

¹²Ine, tekepbirler şeýle gürleýär; olar elmydama gaýgysyz-gamsyz, öz baýlygyny artdyrýandyrlar.

¹³Men biderek ýere kalbymy päk saklapdyryn, günä etmekden saklanypdyryn.

¹⁴Çünki uzakly gün kynçylyga sezewar boldum, her säherde men ejir çekdim.

¹⁵«Men hem şolar ýaly gürlejek» diýen bolsadym, onda Hudaýyň halkynyň öňünde dönük bolardym.

¹⁶Muňa akyl ýetirjek bolup pikire batdym, emma tä Hudaýyň mukaddes öýüne girýänçäm,

¹⁷bu maňa juda kyn bolup göründi. Şondan soň erbetleriň soňuna düşünip galdym.

¹⁸Dogrudan-da, Sen sürçek ýerlerde goýduň olary, harabalyga düşer ýaly etdiň olary.

¹⁹Olar bir salymda wes-weýran boldy, wehimden ýaňa ýok bolup gitdi!

²⁰Düýş görüp oýanylan pursatdaky deý, ýa Taňry, peýda bolan wagtyňda, Sen puja çykararsyň hyýallaryny.

²¹Kalbym hasratdan ýaňa dolup-daşanda, ýüregim sanjym-sanjym bolanda,

²²nadan bolup, düşünmändirin, haýwan kimin bolupdyryn Seniň öňüňde.

²³Ýöne şonda-da mydama Seniň bilendirin, meni golumdan Sen tutýandyrsyň.

²⁴Nesihatlaryň bilen maňa ýol görkezýärsiň, soňunda meni hormat bilen kabul edersiň.

²⁵Meniň göklerde Senden başga kimim bar? Seniň bilen ýerde-gökde ýok mätäçligim.

²⁶Tenim, ýüregim ysgyndan düşýär, ýöne Hudaý ýürek kuwwatym, baky nesibäm.

²⁷Dogrudan-da, Senden uzaklaşýanlar ýok bolup gider, Özüňe biwepalyk edenleri Sen ýok edersiň.

²⁸Meniň üçin bolsa Hudaýa ýakynlaşmak ýagşydyr. Men Hökmürowan Rebbi özüme pena edindim; men Onuň ähli eden işlerini yglan ederin.