Zebur 76

¹Hudaý Ýahudada meşhurdyr, Onuň ady Ysraýylda beýikdir.

²Onuň çadyry Salimdedir, Onuň mekany Siýondadyr.

³Ol şol ýerde döwdi otly peýkamlary hem-de galkany, gylyjy hem-de söweş ýaraglaryny. Sela

⁴Sen nur deý şöhle saçýarsyň, awlaglara baý bolan daglardan dabaralysyň.

⁵Arslan ýürekliler oljasyny aldyrdylar, olar baky uka gitdiler. Iň güýçlüleriň hiç biriniň-de elini galdyrmaga gurby çatmady.

⁶Eý, Ýakubyň Hudaýy, Seniň käýinjiňden atlar, söweş arabalary doňup galdylar.

⁷Sen wehimlisiň! Gazaba müneňde kim durup biler?

⁸Sen göklerden yglan etdiň karary; ýer ýüzüniň ähli pukarasyny halas etmäge,

⁹Sen kazylyk etmek üçin aýaga galdyň, şonda ýer-ýüzi eýmenip, ümsümlik boldy. Sela

¹⁰Saňa öwgi gazandyrar hatda ynsan gazaby, gazabyňdan gutulanlar-da Saňa öwgi aýdarlar.

¹¹Beýik Hudaýyňyza sadaka aýdyň, olary beriň, töweregindäkileriň bary wehimli Hudaýa sowgat getirsin.

¹²Şazadalaryň ruhuny syndyrýan Oldur, ýer ýüzüniň şalaryna wehimli Oldur.