Zebur 80

¹Eý, Ysraýyl Çopany, Eý, Ýusuba sürä deý ýol Görkezýän, gulak goý! Eý, keruplaryň üstünde Oturan, nur saç!

²Efraýymyň, Benýaminiň, Manaşäň öňünde; güýjüňi oýar, gel-de halas et.

³Eý, Hudaý, Sen bizi dikelt, ýüzüň nur saçsyn, halas bolaly.

⁴Ýa Hökmürowan Beýik Hudaý! Öz halkyň doga-dileglerine Sen haçana dek boljak gaharly?

⁵Sen olara gözýaşly çörek iýdirdiň, gözýaşlaryny suw kimin içirdiň.

⁶Goňşy halklar biz babatda jedel edýärler, duşmanlarymyz üstümizden gülýärler.

⁷Bizi dikelt, eý, Hökmürowan Hudaý! Ýüzüň nur saçsyn, halas bolaly.

⁸Üzüm nahalyny Sen Müsürden getirdiň, milletleri kowup, ony oturtdyň.

⁹Sen onuň üçin taýýarladyň topragy, ol kök urup, doldurdy ýurdy.

¹⁰Daglar bürendi onuň saýasyna, äpet kedr daragty – şahalaryna.

¹¹Ol deňze çenli uzatdy şahalaryny, derýa çenli – öz pudaklaryny.

¹²Emma her ötegçiniň onuň miwesini ýolup bileri ýaly, Sen onuň haýatlaryny näme üçin weýran eýlediň?

¹³Tokaý ýekegapany ony dagadýar, meýdan jandarlary ony gemirýär.

¹⁴Dolan, eý, Hökmürowan Hudaý! Göklerden sal Sen nazary, gör bu üzüm bagyny –

¹⁵eliň oturdan bu nahalyny, Özüň üçin kuwwatlandyran ynsan ogluňy.

¹⁶Olar ony otda ýakdylar, ony çapdylar. Goý, olar Seniň gazaply bakyşyňdan ýitip gitsinler.

¹⁷Emma kömek et sagyňdaky ynsana Sen ony Özüň üçin getirensiň kemala

¹⁸Şonda ýüz öwürmeris Senden hiç haçan; bize ýaşaýyş ber, çagyrarys Seniň adyňy.

¹⁹Bizi dikelt, ýa Hökmürowan Beýik Hudaý! Ýüzüň nur saçsyn, halas bolaly.