Zebur 83

¹Eý, Hudaý, dymma, eý, Hudaý, ümsüm, biperwaý bolma.

²Seret, duşmanlaryň pitne turuzýar, Seni ýigrenýänler başlaryny galdyrýar.

³Seniň halkyňa garşy erbet niýet edinýär, Seniň goraýanlaryňa garşy dil birikdirýär.

⁴Diýýärler: «Geliň, ýok edeli, goý, olar millet bolmasyn, mundan beýläk Ysraýylyň ady, goý, agzalmasyn».

⁵Olar bir çukura tüýkürip, dil birikdirýär hem-de Saňa garşy äht baglaşýar:

⁶edomlar we ysmaýyllar, mowaplar we hagarlar,

⁷Gebal, Ammon hem-de Amalek, Pilişt hem-de Suruň ilaty,

⁸Aşur-da goşuldy, olar Lut ogullaryny goldady. Sela

⁹Sen Midýana hem-de Kişon çaýynda Sisera bilen Ýabyna edenleriňi olaryň başyndan inder.

¹⁰Olar Eýndorda heläk edildi, olar topragyň dökünine öwrüldi.

¹¹Orep we Zeýep ýaly et serdarlaryny, Zebah we Salmunna dek – ähli serkerdesini.

¹²Olar: «Geliň, Hudaýyň örülerini özümize mülk edineli» diýdiler.

¹³Eý, Hudaý, tüweleýdäki tozana, ýel öňündäki samana öwür olary.

¹⁴Oduň tokaýy köýdürşi kimin, ýalnyň daglary otlaýşy kimin,

¹⁵harasatyň bilen kowala Sen olary, apy-tupanyň bilen gorkuz olary.

¹⁶Utanja gapla olaň ýüzüni, ýa Reb, şonda olar agtarar Seniň adyňy.

¹⁷Baky ryswa bolup, goý, dowla düşsün, utanç içinde ýok bolup gitsin.

¹⁸Goý, olar bilsin: Reb – diňe Sensiň, tutuş ýeriň Beýik Hudaýsysyň!