Pawlusyň Rimlilere haty 16

¹Kenreadaky ýygnagyň gullukçysy aýal doganymyz Fibini size tabşyrýaryn.

²Ony mukaddeslere mynasyp ýagdaýda Rebde kabul edip, size mätäç zatlarynda kömek beriň, çünki ol köplere, meniň özüme-de kömekçi boldy.

³Mesih Isa ýolunda işdeşlerim Priskilla bilen Akila salam aýdyň.

⁴Olar meniň janym üçin öz janlaryny howp astyna saldylar, olara diňe men däl, milletleriň ähli ýygnaklary hem minnetdar.

⁵Olaryň öýündäki ýygnaga-da salam aýdyň. Mesih üçin Aziýanyň ilkinji miwesi eziz dostum Epenetosa salam aýdyň.

⁶Siziň üçin köp zähmet çeken Mereme salam aýdyň.

⁷Resullar arasynda at-abraý gazanyp, Mesihe menden öň iman eden garyndaşlarym, tussagdaşlarym Andronikosa bilen Ýuniasa salam aýdyň.

⁸Rebde eziz dostum Ampliýatusa salam aýdyň.

⁹Mesihde işdeşimiz Urbanusa, eziz dostum Stahise salam aýdyň.

¹⁰Mesihde synagdan geçen Apellise salam aýdyň. Aristobulosyň içersine salam aýdyň.

¹¹Garyndaşym Hirodiona salam aýdyň. Narkissisiň içersinden Rebde bolanlara salam aýdyň.

¹²Rebde zähmet çekýän Trifena, Trifosa salam aýdyň. Rebde köp zähmet çeken söýgüli Persise salam aýdyň.

¹³Rebde saýlanan Rufusa we maňa hem enelik eden onuň enesine salam aýdyň.

¹⁴Asinkritosa, Flegona, Ermise, Patrobasa, Ermasa we olaryň ýanyndaky doganlara salam aýdyň.

¹⁵Filologosa we Ýuliýa, Nereusa hem-de onuň aýal doganyna, Olimpasa we olaryň ýanyndaky ähli mukaddeslere salam aýdyň.

¹⁶Biri-biriňize mukaddes ogşuk bilen salam aýdyň. Mesihiň hemme ýygnaklary size salam gönderýär.

¹⁷Eý doganlar, öwrenen taglymatyňyza garşy gidip, bölünme we böwetlere sebäp bolýanlardan ägä bolmagy sizden haýyş edýärin, olardan daşda duruň.

¹⁸Çünki beýle adamlar Rebbimiz Isa Mesihe däl-de, öz garynlaryna gulluk edýändir, süýji söz sözläp, owadan gürläp, ýönekeý adamlaryň ýüreklerini aldawa salýandyr.

¹⁹Siziň boýun bolanlygyňyz hemmäniň gulagyna ýetdi. Men munuň üçin hem begenýärin, ýöne siziň ýagşylykda akyldar, erbetlikde ýöntem bolmagyňyzy isleýärin.

²⁰Parahatlyk Hudaýy haý diýmän, şeýtany aýaklaryňyzyň astynda mynjyradar. Rebbimiz Isa Mesihiň merhemeti siziň bilen bolsun!

²¹Işdeşim Timoteos, garyndaşlarym Lukius, Ýason we Sosipatros size salam gönderýär.

²²Bu haty ýazan men Tertius size Rebde salam aýdýaryn.

²³Meni hem bütin ýygnagy myhman alan Gaýus size salam gönderýär. Şäheriň hazynaçysy Erastos we doganymyz Kuwartos size salam gönderýär.

²⁴Rebbimiz Isa Mesihiň merhemeti siziň hemmäňiz bilen bolsun! Omyn.