Pawlusyň Rimlilere haty 3

¹Şeýlelikde, ýehudynyň näme artykmaçlygy bar? Sünnetliligiň peýdasy näme?

²Ähli babatda köp. Çünki Hudaýyň sözleri ilki ýehudylara ynanyldy.

³Onda näme? Käbirleri iman etmände, olaryň imansyzlygy Hudaýyň ynamdarlygyny ýok edermi?

⁴Asla etmez! Ýöne: «Sen Öz sözleriňde dogry çykyp, üstüňden höküm çykarylanda, ýeňer ýaly» diýip ýazylyşy kimin, bütin adamlar ýalançy bolsa-da, Hudaý dogruçyldyr.

⁵Biziň nädogrulygymyz Hudaýyň dogrulygyny görkezýän bolsa, onda näme diýeris? Adamlaryň pikir edişine görä aýdýaryn, gazap edýän Hudaý adalatsyzmydyr?

⁶Ýok! Beýle bolsa, Hudaý dünýäniň üstünden nähili höküm çykaryp biler?

⁷Sebäbi meniň ýalanym bilen Hudaýyň hakykaty Onuň şöhratyny artdyrýan bolsa, näme üçin ýene men günäli hökmünde höküm edilýärin?

⁸Käbirleriniň bize töhmet atyp, şeýle gürleýşimizi aýdyşy ýaly, näme üçin: «Ýagşylyk geler ýaly, ýamanlyk edeliň» diýmäli? Olaryň hökümi dogrudyr.

⁹Indi näme? Biziň artykmaçlygymyz barmy? Asla ýokdur, çünki biz bary günä astyndadyr diýip, öň hem ýehudylary, hem-de grekleri günäkär etdik.

¹⁰Hiç dogry adam ýok, biri-de ýok.

¹¹Düşünýän ýok, Hudaýy agtarýan ýok.

¹²Hemmesi ýoldan çykdy, olaryň ählisi dereksiz boldy. Ýagşylyk edýän ýok, biri-de ýok.

¹³Olaryň bogazy açyk gabyrdyr. Olar dilleri bilen aldaýarlar, dodaklarynda gömülgeniň zäheri bar.

¹⁴Olaryň agzy gargyşdan, ajylykdan doludyr.

¹⁵Olaryň aýagy gan dökmäge ýorga.

¹⁶Olaryň ugran ugry weýrançylyk bilen zorlukdyr.

¹⁷Olar parahatlyk ýoluny bilmediler,

¹⁸gözleriniň öňünde Hudaýdan gorkma ýok» diýlip ýazylandyr.

¹⁹Ýöne her agyz baglanyp, bütin dünýä Hudaýyň hökümine sezewar bolar ýaly, Mukaddes Kanunyň aýdýanlarynyň baryny kanun astyndakylara aýdýandygyny bilýäris.

²⁰Munuň üçin, Onuň huzurynda hiç kim kanun işlerini etmek bilen aklanmaz, çünki günäni bilmek kanun arkaly döreýändir.

²¹Kanun we pygamberler tarapyndan güwä geçilen Hudaýyň dogrulygy,

²²ýagny Isa Mesihe iman arkaly iman edenleriň ählisine we ählisiniň üstünde bolan Hudaýyň dogrulygy şu wagt kanunsyz aýan boldy.

²³Çünki hiç bir parh ýok, sebäbi bary günä edip, Hudaýyň şöhratyndan mahrum boldy.

²⁴Olar Isa Mesihde bolan gutulyş arkaly Onuň merhemeti bilen mugt aklanar.

²⁵Hudaý Mesihi ganyna iman arkaly merhemet kürsüsi edip goýdy. Ol muny ozal Öz sabry astynda ýüze çykan günäleriň ötülmegine degişli adalatyny görkezmek üçin,

²⁶Özi adyl bolup, Mesihe iman edeni aklar ýaly, Özüniň häzirki zaman adalatyny görkezmek üçin etdi.

²⁷Onda öwünme nirede? Ol daşarda. Haýsy kanun bilen? Işleriňki bilenmi? Ýok, iman kanuny bilen.

²⁸Çünki biz adam kanun işlerinden üzňelikde, iman arkaly aklanar diýip hasap edýäris.

²⁹Eýsem, Hudaý diňe ýehudylaryň Hudaýymy? Özge milletleriňki hem dälmi? Ol, elbetde, olaryň hem Hudaýy.

³⁰Sebäbi sünnetlileri-de öz imanlary arkaly, sünnetsizleri-de öz imanlary arkaly aklajak Hudaý ýalňyz Hudaýdyr.

³¹Onda biz iman arkaly kanuny ýatyrýarysmy? Ýok, ony berkarar edýäris.