Psalmi 49

¹audite hoc omnes populi auribus percipite universi habitatores occidentis

²(48:3) tam filii Adam quam filii singulorum simul dives et pauper

³(48:4) os meum loquitur sapientias et meditatio cordis mei prudentias

⁴(48:5) inclino ad parabulam aurem meam aperiam in cithara enigma meum

⁵(48:6) quare timebo in diebus mali iniquitas calcanei mei circumdabit me

⁶(48:7) qui fiduciam habent in fortitudine sua et in multitudine divitiarum suarum superbiunt

⁷(48:8) fratrem redimens non redimet vir nec dabit Deo propitiationem pro eo

⁸(48:9) neque pretium redemptionis animae eorum sed quiescet in saeculo

⁹(48:10) et vivet ultra in sempiternum

¹⁰(48:11) et non videbit interitum cum viderit sapientes morientes simul insipiens et indoctus peribunt et derelinquent alienis divitias suas

¹¹(48:12) interiora sua domus suas in saeculo tabernacula sua in generatione et generatione vocaverunt nominibus suis terras suas

¹²(48:13) et homo in honore non commorabitur adsimilatus est iumentis et exaequatus est

¹³(48:14) haec est via insipientiae eorum et post eos iuxta os eorum current semper

¹⁴(48:15) quasi grex in inferno positi sunt mors pascet eos et subicient eos recti in matutino et figura eorum conteretur in inferno post habitaculum suum

¹⁵(48:16) verumtamen Deus redimet animam meam de manu inferi cum adsumpserit me semper

¹⁶(48:17) noli timere cum ditatus fuerit vir cum multiplicata fuerit gloria domus eius

¹⁷(48:18) neque enim moriens tollet omnia nec descendet post eum gloria eius

¹⁸(48:19) quia animae suae in vita sua benedicet laudabunt inquient te cum benefeceris tibi

¹⁹(48:20) intrabit usque ad generationes patrum suorum usque ad finem non videbunt lucem

²⁰(48:21) homo cum in honore esset non intellexit conparavit se iumentis et silebitur