Psalmi 59

¹erue me de inimicis meis Deus meus et a resistentibus mihi protege me

²(58:3) libera me ab operariis iniquitatis et a viris sanguinum salva me

³(58:4) quia ecce insidiati sunt animae meae congregantur adversum me fortissimi

⁴(58:5) absque iniquitate mea et absque peccato meo Domine non egi inique et illi currunt et praeparantur

⁵(58:6) surge ex adverso pro me et respice et tu Domine Deus exercituum Deus Israhel evigila ut visites omnes gentes non miserearis universis qui operantur iniquitatem semper

⁶(58:7) revertantur ad vesperam et latrent ut canis et circumeant civitatem

⁷(58:8) ecce loquuntur in ore suo gladii in labiis eorum quasi nemo audiat

⁸(58:9) tu autem Domine deridebis eos subsannabis omnes gentes

⁹(58:10) fortitudinem meam ad te servabo quoniam tu Deus elevator meus

¹⁰(58:11) Dei mei misericordia praeveniet me

¹¹(58:12) Deus ostendit mihi in insidiatoribus meis ne occidas eos ne forte obliviscantur populi mei disperge eos in fortitudine tua et destrue eos protector noster Domine

¹²(58:13) in peccato oris sui in sermone labiorum suorum et capiantur in superbia sua maledictionem et mendacium narrantes

¹³(58:14) consume in furore consume ut non subsistant et sciant quoniam Deus dominatur Iacob in finibus terrae semper

¹⁴(58:15) et convertantur ad vesperam et latrent ut canis et circumeant civitatem

¹⁵(58:16) ipsi vagabuntur ut comedant et cum saturati non fuerint murmurabunt

¹⁶(58:17) ego autem cantabo imperium tuum et laudabo mane misericordiam tuam quoniam factus es fortitudo mea et refugium in die tribulationis meae

¹⁷(58:18) tibi cantabo quoniam Deus adiutor meus fortitudo mea Deus misericordia mea