Psalmi 60

¹quando pugnavit adversum Syriam Mesopotamiae et adversum Syriam Suba et reversus est Ioab et percussit Edom in valle Salinarum duodecim milia(59:3) Deus proiecisti nos et scidisti iratus convertisti nos

²(59:4) commovisti terram et disrupisti eam sana contritiones eius quoniam commota est

³(59:5) ostendisti populo tuo duritiam potasti nos vino consopiente

⁴(59:6) dedisti timentibus te signum ut fugerent a facie arcus semper ut liberentur amici tui

⁵(59:7) salva dextera tua et exaudi me

⁶(59:8) Deus locutus est in sanctuario suo laetabor dividam Sicimam et vallem Soccoth dimetiar

⁷(59:9) meus est Galaad et meus Manasse et Efraim fortitudo capitis mei Iudas legifer meus

⁸(59:10) Moab olla lavacri mei super Idumeam incedam calciamento meo mihi Palestina foederata est

⁹(59:11) quis deducet me ad civitatem munitam quis deducet me usque ad Idumeam

¹⁰(59:12) nonne tu Deus qui proiecisti nos et non egredieris Deus in exercitibus nostris

¹¹(59:13) da nobis auxilium in tribulatione vana est enim salus ab homine

¹²(59:14) in Deo faciemus virtutem et ipse conculcabit tribulantes nos