Psalmi 77

¹voce mea ad Dominum clamavi voce mea ad Dominum et exaudivit me

²(76:3) in die tribulationis meae Dominum requisivi manus mea nocte extenditur et non quiescit noluit consolari anima mea

³(76:4) recordans Dei conturbabar loquebar in memet ipso et deficiebat spiritus meus semper

⁴(76:5) prohibebam suspectum oculorum meorum stupebam et non loquebar

⁵(76:6) recogitabam dies antiquos annos pristinos

⁶(76:7) recordabar psalmorum meorum in nocte cum corde meo loquebar et scobebam spiritum meum

⁷(76:8) ergone in aeternum proiciet Dominus et non repropitiabitur ultra

⁸(76:9) ergone conplebit usque in finem misericordiam suam consummabit verbum de generatione et generatione

⁹(76:10) numquid oblitus est misereri Deus aut conplebit in furore misericordias suas semper

¹⁰(76:11) et dixi inbecillitas mea est haec commutatio dexterae Excelsi

¹¹(76:12) recordabor cogitationum Domini reminiscens antiqua mirabilia tua

¹²(76:13) et meditabor in omni opere tuo et adinventiones tuas loquar

¹³(76:14) Deus in sanctuario via tua quis deus magnus ut Deus

¹⁴(76:15) tu es Deus faciens mirabilia ostendens in populis potentiam tuam

¹⁵(76:16) redemisti in brachio populum tuum filios Iacob et Ioseph semper

¹⁶(76:17) videntes te aquae Deus videntes te aquae parturierunt et commotae sunt abyssi

¹⁷(76:18) excusserunt aquas nubila vocem dederunt nubes et sagittae tuae discurrebant

¹⁸(76:19) vox tonitrui tui in rota apparuerunt fulgora tua orbi concussa est et commota est terra

¹⁹(76:20) in mari via tua et semitae tuae in aquis multis et vestigia tua non sunt agnita

²⁰(76:21) deduxisti quasi gregem populum tuum in manu Mosi et Aaron